Qazaqstanda tórtinshi munai óńdeý zaýytyn salýǵa qatysty sheshim qabyldaýdy jedeldetý qajet. Bul týraly búgin Úkimettiń keńeitilgen májilisinde Qazaqstan Prezidenti Nursultan Nazarbaev aitty, dep habarlaidy QazAqparat.
«Munai men gazdy qaita óńdeý mańyzdy baǵyt sanalady. Biz bul jaiynda aittyq jáne salany damytatyn bolamyz. Ol qajet ári bul sala áli de uzaq ýaqyt basymdyqqa ie bolady. Buǵan qosa, eldi janarmaimen qamtamasyz etý máselesi jii kóteriledi», - dedi Memleket basshysy.
Osy rette Nursultan Nazarbaev elimizdegi úsh munai óńdeý zaýytynyń jańǵyrtylǵandyǵyn atap ótti.
«Biz úsh munai óńdeý zaýytyn jańǵyrttyq. Janar-jaǵarmai tapshylyǵy taiaý 3-4 jylda jabylady. Qanat Bozymbaev (QR Energetika ministri - avt.) solai ǵoi? Odan keiin qaitadan importtaityn bolamyz. Tez arada tórtinshi zaýyt salý qajettigin aitqan kezde, sizder onyń qajet emestigin, bizde janar-jaǵarmai jetkilikti bolyp, qaida jibererimizdi bilmei qalatynymyzdy aityp, dáleldedińizder. Iaǵni, biz problema qýyp jetken kezde jumys istei bastaimyz. Sondyqtan qazirgi ýaqytta bul ispen ainalysyp jatqanyn bilemin jáne Qarashyǵanaqtaǵy investorlarmen áńgime boldy. Munai óńdeý zaýyty boiynsha sheshim qabyldaýdy jedeldetý qajet», - dedi Qazaqstan Prezidenti.
