QR Energetika ministri Qanat Bozymbaev Ortalyq kommýnikatsiialar qyzmetinde ótken baspasóz-máslixatynda Qyrǵyzstanǵa munai ónimderin zańsyz tasymaldaýshylar týraly pikir bildirdi, dep xabarlaidy "Ult aqparat" Baq.kz portalyna silteme jasap.
«Qyrǵyzstanda AI-92 baǵasy 190-200 teńge bolsa, Qazaqstanda qazir 160 teńge. Otyz teńge aiyrmashylyq bar. Árine bul paida tabamyn degen kásipkerlerge zańsyz sxemalarǵa qol sozýǵa múmkindik berip otyr. Óitkeni bir litrden otyz teńge olar úshin úlken paida bolaiyn dep jatyr», - dedi Qanat Bozymbaev.
Sonymen birge ol sońǵy ýaqytta tirkelgen birneshe oqiǵany atap ótip, munai urlyǵyna qarsy tiisti sharalardyń atqarylyp jatqanyn atap ótti.
«Tiisti memlekettik organdar olarǵa qarsy sharalardy istep jatyr. Jaqynda ǵana Jambyl oblysynda osyndai oqiǵa bolǵanyn ózderińiz jaqsy bilesizder. Ótken aptada OQO-da da osyndai oqiǵa oryn alǵan. Munai qubyrlaryn tesý arqyly munai alyp, ony shetelge jibergen qylmystyq top ustaldy. Ministrlik tarapynan júieli top qurdyq, oǵan tek ministrlik qyzmetkerleri ǵana emes basqa da memlekettik organ qyzmetkerleri kirip otyr», - dedi QR Energetika ministri Qanat Bozymbaev.
Ol sondai-aq osy máselege bailanysty jaqyn ýaqytta qandai zańnamalyq, normativtik ózgerister engiziletini týraly xabardar etetinin málimdedi.
