Oblys ákimi Danial AHMETOV elimizdegi Kanadanyń tótenshe jáne ókiletti elshisi Shon Staildy qabyldap, taý-ken óndirisi sektoryndaǵy, sondai-aq, aýyl sharýashylyǵy, týrizm jáne sport salalaryndaǵy áriptestik máselelerin talqylady.
Kezdesýde aimaq basshysy atap ótkendei, búginde elimiz, onyń ishinde Shyǵys Qazaqstan oblysy ýran óndirý jaǵynan álemde kósh bastap tur. Buǵan qosa, óńirimiz sirek kezdesetin qazba bailyqtaryn eksporttaý jaǵynan da aldyńǵy qatarda keledi.
– Qazir Aiagóz aýdanynda katodty mys óndiretin taý-ken baiytý kesheniniń qurylysy aiaqtalýda. Sondai-aq, oblysymyzda agrarlyq sektordyń jetistikteri de az emes. Osy oraida, klimaty jaǵynan bizdiń óńir Kanadanyń birneshe provintsiiasymen óte uqsas ekenin de atap ótken jón. Sol sebepti, áriptestigimiz baiandy bolatynyna senim mol, – dedi oblys ákimi Danial AHMETOV.
Aimaq basshysy sonymen qatar, 21-qazanda Óskemende «Altai Invest-2016» forýmy ótetinin aityp, sheteldik diplomatty aitýly is-sharaǵa qonaq bolýǵa shaqyrdy.
– Ekonomika máselelerine kelsek, qazir bul turǵydaǵy bizdiń basty áriptesimiz dep Qytai Halyq Respýblikasyn aitýǵa bolady. Aldaǵy investitsiialyq forýmǵa osy eldiń ózinen ǵana júzdegen investor qatysady dep josparlanýda. Degenmen, biz kanadalyq áriptesterimizdi de qýana qarsy alamyz. Sizderdiń investorlaryńyzben de jan-jaqty bailanys ornatýǵa ázirmiz, – dedi aimaq basshysy.
Óz kezeginde Shon Stail myrza oblys ákiminiń shaqyrtýyn zor rizashylyqpen qabyl alatynyn aityp, kanadalyq investorlardy birinshi kezekte Shyǵys Qazaqstannyń taý-ken metallýrgiiasyndaǵy áleýeti qyzyqtyratynyn jetkizdi.
– Bizdiń elde geologiialyq barlaýmen jáne taý-ken óndirisimen ainalysatyn usaq kompaniialar óte kóp. Sizderde bolsa, kerisinshe, «KAZ Minerals», «Qaztsink» siiaqty alpaýyt kompaniialarǵa basymdyq berilgen. Búgingidei kezdesýler osy saladaǵy áriptestigimizdi nyǵaityp, eki jaqqa da tiimdi bolatyn birlesken jumys júrgizýge óz septigin tigizedi dep úmittenemiz. Degenmen, bizdiń biznesmenderdi tek qana metallýrgiia salasy qyzyqtyrady deý durys emes. Kanadalyq investorlar Shyǵys Qazaqstandaǵy ózge iri korporatsiialarǵa da qarjy quiýǵa daiyn, – degen elshi oblys ákimin keler jyly Kanadanyń Toronto qalasynda ótetin geologiialyq barlaý jáne taý-ken óndirisin damytý máselelerine arnalǵan dástúrli konferentsiiaǵa qatysýǵa shaqyrdy.
Taǵy bir aita keter jait, oblys ákimimen ótken kezdesýden keiin Shon Stail myrza buqaralyq aqparat quraldary ókilderine suhbat berip, onda kanadalyq tarap eki el arasyndaǵy shaibaly hokkeige qatysty áriptestikti de nyǵaitýǵa múddeli ekenin jetkizdi. Óz sózinde sheteldik diplomat Kanada elshiligi Óskemenge bilikti hokkei bapkerlerin jumysqa tartýǵa, sondai-aq, túrli deńgeidegi joldastyq kezdesýler ótkizýge kómektesýge ázir ekenin jetkizdi.
Ait keteiik, byltyr Shyǵys Qazaqstan men Kanada arasyndaǵy taýar ainalymynyń kólemi 9,7 million AQSh dollaryn quraǵan.
Nurjan Kenjeuly, "Didar" gazeti
