Qazaqstandyq kásipqoi boksshy Batyr Júkembaev (17-0, 13 KO) basty aiqasta shyǵatyn Kanadadaǵy boks keshine barlyq biletter satylyp ketti. Bul týraly boksshynyń PR-menedjeri málim etti, dep habarlaidy QazAqparat tilshisi.
Jekpe-jek 25 qańtarda Kanadanyń Monreal qalasyndaǵy Montreal Casino arenasynda ótedi.
Qazaqstandyq boksshy birinshi orta salmaqtaǵy WBA Continental Americas jáne IBF Inter-Continental titýldaryn qorǵaidy. Qarsylasy – argentinalyq Maksimiliano Rikardo Veron (12-3-1, 4 KO).
«Qarsylasym 16 jekpe-jekte 12 márte jeńiske jetken IBF Latino chempiony. Bul 2020 jylǵy men úshin alǵashqy úlken synaq!», - dep jazǵan bolatyn otandasymyz Instagram-paraqshasynda.
Esterińizge sala keteiik, Batyr Júkembaev byltyr 26 qyrkúiek kúni Monrealda meksikalyq Migel Vaskeske qarsy (41-9, 15 KO) ótkizgen sońǵy judyryqtasýynda tóreshilerdiń biraýyzdy sheshimimen jeńiske jetken bolatyn. Halyqaralyq boks uiymynyń (IBO) reitinginde ol óz salmaǵynda 11-shi orynda tur.
