Kanada Premer-ministri Djastin Triýdo 9 qańtarda baspasóz máslihatynda "qolda bar dálelderge súiene otyryp", Tegeranda qulaǵan ýkrainalyq jolaýshylar ushaǵyn "Irannyń zymyrany atyp túsirgen" dep málimdedi. Onyń paiymdaýynsha, ushaqqa raketa "abaisyzda tigen".
AQSh-tyń resmi ókilderi de ýkrainalyq jolaýshylar ushaǵyn Irannyń zymyrany baiqaýsyzda atyp túsirgen dep sanaidy.
Bortynda 176 adam bar Ýkraina áýe kompaniiasynyń PS 752 reisi 8 qańtarda Tegeran áýejaiynda apatqa ushyraǵan. Ushaqtaǵy adamdardyń bári kóz jumǵan. Ýkraina tarabynyń dereginshe, ushaqta 82 irandyq, 63 kanadalyq, 10 shved, 4 aýǵan, 3 britandyq jáne Germaniianyń 3 azamaty bolǵan. Ýkraina qaýipsizdik qyzmeti apat saldarynan qaza tapqan 11 ýkraindyqtyń arasynda ekipajdyń toǵyz múshesi bar dep habarlady.
Ushaq apaty Tegeran AQSh-tyń Iraktaǵy áskeri bazasyn zymyranmen atqylaǵannan bir saǵat ótkende bolǵan.
Aty-jónin aitpaǵan AQSh-tyń resmi ókilderi Irannyń zymyrany abaisyzda Boeing 737-800 ushaǵyn atyp túsirgenine “senimdi”. Olar bul derekti amerikalyq basylymdarǵa aitqan. Resmi ókilder spýtnik, radar jáne elektrondyq derekterdi teksergen.
Newsweek saityna derektermen bólisken Pentagon, AQSh pen Iraktyń barlaý qyzmetiniń ókilderi “ýkrainalyq ushaqqa Reseide jasalǵan Tor zymyrany tigenine senimdi”.
AQSh barlaý qyzmetiniń ókili CBS News saityna aitýynsha, amerikalyq spýtnikterge Irannan eki zymyran ushyp shyqqan sát jáne keiingi jarylys túsip qalǵan.
Pentagon bul aqparattarǵa qatysty kommentarii bildirgen joq.
Buǵan deiin AQSh prezidenti Donald Tramp Twitter jelisinde ushaq apatyna qatysty kúdigi baryn jazyp, “bireý qatelik jasady-aý” degen.
“Keibir adamdar mehanika dep jatyr. Jeke basym, olai dep oilamaimyn. Óte jaman jaǵdai bolǵan siiaqty” dep jazǵan edi Tramp.
Reuters agenttiginiń jazýynsha, Irannyń azamattyq aviatsiia qyzmetiniń jetekshisi “ýkrainalyq ushaqty Iran zymyrany atyp túsirgen” degen aqparatty “absýrd” dep atady. Iran transport ministrligi de amerikalyq basylymdardaǵy aqparatty joqqa shyǵaryp, “Tegeran áýejaiynan ýkrainalyq ushaqpen birge jergilikti jáne halyqaralyq birneshe ushaq ushyp shyqqanyn” málimdedi.
Ýkrainanyń ulttyq qaýipsizdik jáne qorǵanys keńesiniń hatshysy Aleksei Danilov 9 qańtar tús aýa “Tegeranda qulaǵan Ýkraina áýe kompaniiasynyń Boeing ushaǵy raketamen atyp túsirilýi múmkin” degen. Ol ushaqqa Reseide jasalǵan "Tor" zenittik-raketkalyq kompleksinen jiberilgen zymyran tiiýi múmkin degen boljam aitqan edi.
Al Iran biligi ushaq motory janyp, pilottar ushaqqa ie bola almai qalýy múmkin degen boljam jasaǵan.
Internette taraǵan videolarda ushaqtyń áýede órtene bastaǵany kórinedi.
Apatqa ushyraǵan ushaqtyń zaýyttan shyqqanyna úsh jyl bolǵan jáne 6 qańtarda tekserýden ótken. Ushaq ushyp shyqqanda eshqandai tótenshe jaǵdai týraly habar bermegen.
