© Photo : Press-slýjba NOK Kazahstana
Qyzylorda oblysy ákimi Nurlybek Nálibaev bokstan Olimpiada oiyndarynyń qola júldegeri, Aziia oiyndarynyń kúmis júldegeri Qamshybek Qońqabaevqa páter kiltin tabystady, dep habarlady óńir ákiminiń baspasóz qyzmeti.
Eske salsaq, Qamshybek Hanchjoý (Qytai) qalasynda ótken HIH Jazǵy Aziia oiyndarynda kúmis júldeger atanyp, Parij olimpiadasyna joldama jeńip alǵan edi.
Aimaq basshysy boksshynyń daiyndyq barysy týraly surap, aldaǵy dúbirli dodadan jeńispen oralýyna tilektestik bildirdi.
"Qamshybek, biz seni maqtan tutamyz! Búgingi jetken biigiń – jastaiyńnan osy sport túrin tańdap, tabandylyq tanytqan qajyrly eńbektiń nátijesi, ata-anań, jankúierlerdiń tilegi men batasynyń arqasynda dep bilemiz. Árbir syrboiylyq sportshynyń jetistigine qýanamyn. El sportynyń mártebesin asqaqtatyp, halyqtyń rýhyn kótergen jeńis úshin barsha Syr jurtshylyǵynyń atynan alǵys bildiremiz", - dedi Nurlybek Mashbekuly.
Ol chempiondarǵa qarap, myńdaǵan jastyń sportqa degen qulshynysy artatynyn atap ótti.
"Búgingi kezdesýdiń basty maqsaty – eldiń ystyq yqylasy men tilegin jetkizý. Arqa súieitin, tileýińdi tileitin qalyń elińniń, jerlesterińniń atynan ózińdi qoldaý ári yntalandyrý úshin arnaiy syi-siiapat jasap, baspana kiltin tabystaýdy jón kórdik", – dedi ákim.
Al sportshy Olimp shyńyn baǵyndyrýǵa bar kúsh-jigerin jumsaitynyn aitty.
Aimaq sportshylary jyl basynan beri Álem, Aziia chempionattary men kýbokterinen 61 medal jeńip aldy. Ázirge qyzylordalyq sportshylar qorjynynda Parij olimpiadasynyń 7 joldamasy bar.
