Tokio Olimpidasynda bokstan asa aýyr salmaq dárejesi boiynsha alańǵa shyqqan qazaqstandyq boksshy Qamshybek Qońqabaev alǵashqy qarsylasyn aiqyn basymdyqpen jeńdi. Sodan keiin boksshy suhbat berip, jekpe-jek kezinde oiyndaǵy ádistiń barlyǵyn tolyq oryndai almaǵanyn jetkizdi, dep jazdy Olympic.kz.
"Jekpe-jekte oiymdaǵy ádisterdi júz paiyz oryndai almadym. Birinshi kezdesý bolǵandyqtan, qobaljý da boldy. Jeńis úshin bar kúsh-jigerimdi saldym. Qarsylasym da osal emes, myqty ári boishań. Keibir ádisim jaqsy shyqsa, endi biri ótpei qaldy. Sol úshin ár kezdesýge daiyn bolý kerek", - dedi Qońqabaev.
Aitýynsha, kelesi qarsylasy da osal emes.
"Reseilik boksshymen sparringtik kezdesýler ótkizdim. Jarys kezinde bári de basqasha bolatyny anyq. Kópshiligi meni Ózbekstan namysyn qorǵaityn Bahador Jalolovpen kezdestirýge asyq. Biraq men úshin árbir qarsylas myqty. Sebebi bul – Olimpiada. Keshe biraz jigittiń jarysty aiaqtaǵany da janymyzǵa batyp, kóńil kúiimdi túsirdi. Dese de, elimizdi qýantýǵa daiynbyz, bar kúshimizdi salamyz", - dedi Qamshybek.
Aita keteri, Qońqabaev alǵashqy jekpe-jekte mysyrlyq Esri Mostafa Rezkpen qolǵap túiistirdi. Birinshi raýndta ekeýi óte saq qimyldady. Qamshybektiń qarsylasy boishań, qoly da uzyn. Degenmen qazaqstandyq boksshy birneshe soqqysyn dál tigizdi. Sonyń arqasynda birinshi raýndta bes tóreshiniń bári oǵan joǵary upai berdi. Ekinshi raýnd ta Qońqabaevtyń paidasyna sheshildi. Sońǵy raýndta mysyrlyq boksshy eshteńe istei almady. Qorytyndy esep – 5:0.
Qazir Qazaqstan qorjynynda dziýdoshy Eldos Smetov, aýyr atletshi Igor Son men Zýlfiia Chinshanlo jeńip alǵan úsh qola medal bar.
