QR Aýyl sharýashylyǵy ministri Erbol Qarashókeev álemdegi geosaiasi jaǵdaiǵa bailanysty astyq eksportyna tolyq tyiym salý týraly usynys jóninde pikir bildirdi, dep habarlaidy QazAqparat.
«Álemde bolyp jatqan jaǵdaiǵa bailanysty un eksportyna tolyq tyiym salmasaq, ózimiz ónimsiz qalamyz dep júrgender bar. Olardyń aitýynsha, Qazaqstan qoldaǵy unnyń bárin satyp jibergen», - dedi BAQ ókili ministrge Májilistiń kýlýarynda.
«Bizde Qazaqstanǵa jarty jylǵa jetetin un bar. Onyń ústine astyq ta bar. Qajet bolsa, unǵa ainaldyra alamyz. Qarapaiym ǵana mysal keltireiin. «Azyq-túlik kroporatsiiasynyń» qambasynda 800 myń tonna astyq bar. Ony unǵa ainaldyrsaq, Qazaqstanǵa qajet unnyń 2 jarym jyldyq qoryn alýǵa bolady. Sondyqtan qaita óńdeýshilerdi sabasyna túsirgim keledi. Eger olar qandai da bir sebeppen bul biznespen ainalysqysy kelmese, bul alańǵa kez kelgen sátte «Azyq-túlik korporatsiiasy» kele alady. Ózindegi astyqty qaita óńdep, Qazaqstan naryǵyna un jetkizedi. Biraq bul durys bolmaidy dep oilaimyn. Óitkeni, mundai ispen biznes ainalysýy kerek», - dedi vedomstvo basshysy.
Sondai-aq, ol ministrlik tarapynan astyq eksporttaýshylarǵa qandai usynys aitylǵanyn málim etti.
«Qazir bidai óndirýshiler baǵanyń óskenin kútip otyrǵanyn túsinemiz. Sondyqtan olar negizgi kólemdi ózderinde ustap otyr. Baǵa ári qarai óse túsedi dep oilaidy. Osyǵan bailanysty, teńgerimdi saqtaý úshin 15 maýsymǵa deiin astyqshylar Qazaqstannan 1 mln. tonnaǵa deiin astyq shyǵara alady dep otyrmyz. Biraq, sonyń aiasynda osy kólemniń 10 paiyzyn, iaǵni 100 myń tonna astyqty Qazaqstan naryǵyna arzan baǵamen ótkizýleri kerek. Biz osylai usyndyq. Dál osyndai usynysty un óndirýshilerge de aityp otyrmyz. Olar 15 maýsymǵa deiin 300 myń tonnaǵa deiin ǵana un shyǵarýy kerek. Sol shyǵarǵan ónimniń 10 paiyzy kóleminde ishki naryqqa arzan baǵamen satýy kerek. Bul astyq eksporttaýshylardyń da, un eksporttaýshylardyń da quqyǵyn buzbaidy», - dedi Erbol Qarashókeev.
Aitýynsha, usynylyp otyrǵan kvota mólsheri jyldaǵy eksport kóleminen az emes.
«Sońǵy 5 jylda naýryz, sáýir, maýsym ailarynda Qazaqstannan 100-120 myń tonna un shyǵarylyp turǵan. Bul biz belgilep otyrǵan 300 myń tonna kvota eksporttaýshylarǵa tolyǵymen jetkilikti degen sóz. Astyq boiynsha da solai. Orta eseppen aiyna 500 myń tonna astyq shyǵarylyp kelgen», - dedi ministr.
