Elimizde 5 aptaǵa sozylǵan qatań karantin sharalary jemisin berip, koronavirýs indetiniń taralý kórsetkishi aitarlyqtai tómendedi. Meditsina qyzmetkerlerine de júkteme eselep azaiyp, osy ýaqytqa deiin esigi tars jabyq bolǵan emhanalar men aýrýhanalar naýqastardy qalypty rejimde qabyldaý jumystaryna kirisip te jatyr.
Osyǵan bailanysty kúni keshe QR Premer-Ministri Asqar Maminniń tóraǵalyǵymen ótken memlekettik komissiia otyrysynda qalyptasqan epidemiologiialyq jaǵdaidy eskere otyryp, karantin sharalaryn kezeń-kezeńimen alyp tastaý jospary qaralǵan bolatyn.
Sonymen osy aidyń 17 tamyzynan bastap barlyq óńirde saýda oiyn-saýyq ortalyqtary, saýda jelileri, jabyq bazarlar, sán salondary, shashtaraz, SPA ortalyqtar, kosmetologiialyq qyzmet kórsetetin kásipkerlik sýbektileriniń qyzmeti jandanady. Basseini joq fitnes ortalyqtar, basseini joq monshalar men saýnalar, bilim berý ortalyqtary, mektepke deiingi balalar mekemeleriniń kezekshi toptary, ashyq aýadaǵy attraktsiondar jumysyn bastaidy. Biraq, bul atalǵan sýbektilerdiń barlyǵy da meilinshe jartylai qýattylyqpen jumys istegeni durys. Tutynýshylardy toptap qabyldaýǵa bolmaidy. Sonymen qatar, jumys berýshiler úshin qyzmetkerlerdiń 80 paiyz qashyqtan eńbek etý erejesin saqtaýy usynylady.
Bul rette karantin sharalary alynyp tastaldy dep erkinsýge bolmaidy. Sanitarlyq-epidemiologiialyq talaptardy qatań saqtap, maska taǵý, qoldy únemi sabyndap jýý, antiseptik paidalaný, qoǵamdyq oryndarda ara qashyqtyq ustaný qajet. Óitkeni, alda koronavirýstyń ekinshi tolqyny júrý qaýpi joǵary.
«Karantinniń jeńildetilýmen qatar belgili bir qaýipterdiń kúrdelene túsýi qatar júredi. Koronavirýsqa qatysty bul qaýipter memlekettik qurylymǵa ne bolmasa aýrýhanalardaǵy tósek-orynǵa emes, adamnyń mentalitetine, adamdardyń baiyppen nemese júrdim-bardym qaraýyna, elimizde týyndaǵan ortaq problemaǵa adami birige bilýine bailanysty. Dál osy deńgeide, koronavirýsqa qatysty qazirgi jaǵdaida bul úlken qaýip týyndaidy. Indet juqtyryp, ózgelerge taratpaý úshin ózińe, ózińdi qorshaǵan ortaǵa jaýapkershilikpen qaraǵan jón. Koronavirýs indetiniń ekinshi tolqynynan qalai ótetindigimiz ózimizge jáne tártibimizge, is-áreketterimizge bailanysty», - degen edi Májilis depýtaty Pavel Kazantsev.
Jumys kúnderi karantindik sharalar jeńildegenmen, demalys kúnderi karantin tártibi qatań saqtalady. 65 jastan asqan azamattardyń kóshege shyǵýy shekteledi. Qoǵamdyq kólikterdiń qozǵalysy toqtaidy jáne demalys kúnderi jumysqa barýǵa tyiym salynady. Bul da koronavirýs indetiniń taralýyna jol bermeý úshin jasalyp otyrǵan májbúrli shara desek te bolady. Degenmen, senbi-jeksenbide azyq-túlik dúkenderi men dárihanalar jumysyn jalǵastyra beredi.
Al oiyn-saýyq, sport, otbasylyq, estelik, saltanatty jáne basqa da buqaralyq is-sharalardy ótkizýge, barlardyń, túngi jáne oiyn klýbtarynyń, karaoke, fýdkort, kinoteatrlardyń jáne balalar men eresekterge arnalǵan basqa da oiyn-saýyq oryndarynyń jumysyna, mádeniet nysandarynyń, mýzeilerdiń qyzmetine, konferentsiialar, kórmeler, forýmdar ótkizýge; basseinder, qalalyq jáne qoǵamdyq jaǵajailar, ashyq akvaparkterdiń, dini nysandardyń jumysyna tyiym bar.
Qazaqstannyń strategiialyq zertteýler institýty direktorynyń orynbasary Sanat Kóshkimbaevta karantin sharalardy jeńildetilgenmen maska taǵý, áleýmettik araqashyqtyq ustaný, antiseptikterdi paidalaný, qoldy jii jýý siiaqty saqtyq sharalaryn árbir adam ustanýy tiistigin basa aitady.
«Shyndyǵyna kelgende, munyń barlyǵy eń aldymen adamnyń ózine bailanysty jait. Máselen, adam sany óte kóp Qytaidyń ózinde aýrýǵa shaldyqqandar sanynyń qansha paiyz bolǵanyn jáne saldary qandai ekendigin kórip otyrmyz. Ońtústik Koreia, Vetnam elderiniń de turǵyndary ustanymdyq tanytýdyń joǵary deńgeiin kórsetýde. Bul óte mańyzdy», - dedi institýt direktorynyń orynbasary.
