Qazaqstannyń birqatar óńirinde sý tasqynyń oryn alý qaýpi bar. Bul týraly búgin Úkimettiń selektorlyq rejimdegi otyrysynda QR Ishki ister ministri Qalmuhanbet Qasymov aitty, dep habarlaidy QazAqparat.
«Ministrlik jergilikti atqarýshy organdarmen birge kóktemgi sý tasqyny qaterin azaitý úshin keshendi sharalar atqardy. Qazgidromettiń boljamdy málimetteri boiynsha, jalpy elimizde qar kólemi normadan tómen. Degenmen, sý tasqyny qaýpi jerdiń kóktemgi ylǵaldaný deńgeiiniń joǵary bolýymen kúrdelenip otyr. Qazirgi ýaqytta jer tońynyń qalyńdyǵy 60 santimetrden 1,5 metrge deiin jetedi. Bul ótken jylǵy kórsetkishten birshama joǵary. Biraq, qardyń jinalýy da jalǵasyp jatyr», - dedi ministr.
Onyń dereginshe, eń kúrdeli jaǵdai muzdyń erip, Syrdariia ózeni sýynyń deńgeiiniń artýyna bailanysty Ońtústik Qazaqstan men Qyzylorda oblystarynda bolýy yqimal. Sondai-aq Aqmola, Qaraǵandy, Qostanai jáne Soltústik Qazaqstan oblystarynda da sý tasqynyń oryn alý qaýpi bar.
«Kóktemi sý tasqyny kezinde jaǵdaidyń aldyn alý maqsatynda arnaiy toptar quryldy. 49 myńnan astam adamnan turatyn bólimder jasaqtaldy. 16800 tehnika bar. Sý tasqyny bolǵan jaǵdaida halyqty qaýipsiz jerge kóshirýge arnalǵan beketter anyqtalyp, baǵdarlary belgilengen. Qajetti kólik quraldarymen de qamtamasyz etilgen. Ulttyq gvardiia men Ishki ister ministrliginiń áskeri jasaqtary da daiyn», - dedi Qalmuhanbet Qasymov.
Ministrdiń dereginshe, jergilikti atqarýshy organdar eldi mekenderden 3,5 mln tonna tekshe metr qar shyǵarǵan. 8,5 myń tonna janarmai, 125 myń tonna qajetti materialdar bar. Ákimdikter tótenshe jaǵdailar bolǵan jaǵdaiǵa 24,7 mlrd teńge daiyndap otyr.
