Qazaqstannyń Ýkrainadaǵy tótenshe jáne ókiletti elshisi Darhan Qaletaev qazaqstandyqtardy evakýatsiialaý joldary týraly aitty. Onyń sózine qaraǵanda, Ýkrainanyń áýe keńistigi jabyq, sondyqtan elshilik basqa joldy qarastyryp jatyr, dep habarlaidy Azattyq tilshisi.
- Áýejai izdep jatyrmyz. Qai jerge Air Astana'nyń ushaǵy qonatyn múmkindik baryn anyqtaý kerek. Belarýspen shekara jabyq. Moldovaǵa avtokólik joly Odessa arqyly baratyndyqtan qaýipti. Ol jerlerde soǵys bolyp jatyr. Eń qaýipsizi Lvov qalasy, azamattarǵa sol jaqqa barýdy usynyp jatyrmyz. Ary qarai Polsha ne Vengriiaǵa shyǵarýǵa tyrysamyz. Azamattardyń Eýropa elderine vizasy joq, sondyqtan qai memleket bizge jasyl koridor bere alatynyna bailanysty. Ázirge jospar osyndai, – dedi elshi.
Elshiniń sózinshe, Kiev kóshelerinde keptelis, turǵyndarda dúrligý bar. Soǵan qaramastan elshilik jumys istep tur. Qazir elshilik ǵimaratynda Qazaqstannyń 30 shaqty azamaty bar. Ýkrainadaǵy Qazaqstan elshiliginiń málimetinshe, 2 myńdai azamat konsýldyq tirkeýde tur.
24 aqpanda tańerteń Qazaqstan syrtqy ister ministrliginiń resmi ókili Aibek Smadiiarov Ýkrainadaǵy qazaqstandyqtardy evakýatsiialaý amaldaryn qarastyryp jatqanyn habarlaǵan.
24 aqpanda Resei basshysy Vladimir Pýtin Donbasta "áskeri operatsiia" bastaitynyn habarlap, artynsha Ýkrainanyń túrli aimaǵynda jarylystar bolǵany belgili boldy. Ýkraina ishki ister ministrligi 17 oblysta jarylys pen áýeden soqqy jasalǵanyn habarlady. Elde áskeri jaǵdai jariialandy.
NATO bas hatshysy Iens Stoltenberg Reseidiń Ýkrainaǵa qatysty áreketin aiyptady. Ýkraina basshysy Vladimir Zelenskii halyqqa úndeý jasap, úreilenbeýge shaqyrdy. Elde áskeri jaǵdai jariialandy. BUU bas hatshysy Antoniý Gýterrish Máskeýdi "adamzat úshin áskerin Ýkrainadan áketýge" úndedi.
