Onyń aitýynsha, reseilik áskerilerdiń basty maqsaty - "bilikti qulatý" úshin astanany qorshaýǵa alyp, basyp alý. "Olardyń jospary bizdiń jigitterdiń arqasynda júzege aspai jatyr. Shaiqas júrip jatqan Býcha, Vortsel, Irpen, Gostomelde bizdiń adamdar Kievti qorshaýǵa alýdyń barlyq josparyn buzyp jatyr", - dedi ákim.
Klichko ártúrli mamandyq ieleri, onyń ishinde mýzykanttar men akterler qalany qorǵaý úshin tik turǵanyn atap ótti.
"Eshteńe bolmaidy, qalany bermeimiz" deitin rýh buryn-sońdy bolmaǵan. Men muny qaitalaimyn: qala, turǵyndar qarsy turady. Qala ǵimarattar emes, ol eń aldymen, - adamdar. Olar qalany bermeidi, jaý ótpeidi", - dedi ákim.
Vladimir Klichko Kiev turǵyndary otbasyn qaladan shyǵaryp, qaita oralyp jatqanyna nazar aýdardy.
Euronews málimetinshe, reseilik áskerdiń Kievke shabýyly jalǵasyp jatyr jáne reseilik áskeriler qazir qalany soltústik pen batystan qorshaýǵa alǵan.
Kiev Máskeýdi azamattyq infraqurylymdy: turǵyn úilerdi, mektepter men aýrýhanalardy bombalady dep aiyptaidy. Resei buǵan qatysy bar ekenin joqqa shyǵarady.
"Resei áskerleri Ýkrainada gýmanitarlyq apat jasap úlgerdi. Bul - olardyń josparynyń bir bóligi. Olar tize búgip basqynshylardyń qolynan nan men sý suraityndai halqymyzdy masqaralaǵysy keledi. Sondyqtan olar Mariýpoldi jaýyp jatyr, sondyqtan Volnovahany jaýyp jatyr, basqa qalalardy jaýyp jatyr", - dedi Ýkraina prezidenti Vladimir Zelenskii.
©"Ýkraina 24"/video kadry
