QR Prezident Ákimshiligi men Qazaqstan Jazýshylar odaǵynyń birlesken jobasy - "Ádebi ólketanýdy damytý" atty aýqymdy joba Aqmola oblysynda bastaý aldy.
«Rýhani jańǵyrý» baǵdarlamasy aiasynda júzege asatyn úlken ádebi-mádeni sharalardyń biri sanalatyn bul respýblikalyq jobany júzege asyrýǵa Aqmola oblysynyń ákimdigi birinshi bolyp ynta-yqylas bildirip, Qazaqstan Jazýshylar odaǵymen kelisim-shartqa otyrǵan-dy. Búgin osy jobaǵa qatysýshy almatylyq, astanalyq qalamgerler - filologiia ǵylymdarynyń doktory, jazýshy Nurdáýlet Aqysh, aqyn, jýrnalist Jumash Kenebai, synshy, jazýshy Aigúl Kemelbaeva Kókshetaýǵa at basyn tiredi.
Ádebiet jáne óner mýzeiiniń uiymdastyrýymen ótken bul kezdesýde qalamgerler Kóksheniń ziialy qaýym ókilderimen, oqyrmandarmen júzdesti, jumys josparlaryn bólisti. Aldaǵy kúnderi qalamgerler murajailar men muraǵattardy aralap, bolashaqta shyǵarmalaryna arqaý etetin ólkeniń eli men jerimen, tarihymen tanysý maqsatynda Býrabai, Birjan sal, Atbasar, Zerendi, Tselinograd, Ereimentaý, Qorǵaljyn aýdandaryna jolǵa shyǵady.
Aita keteiik, atalmysh joba aiasynda ár óńirlerden arnaiy shyǵarmashylyq toptar jasaqtalady. Olar belgilengen keste-jospar boiynsha oblys-aýdandarǵa ádebi ekspeditsiialar uiymdastyryp, zertteý jumystaryn júrgizedi, kórkem shyǵarma jazýmen shuǵyldanady.
"Ádebi ólketanýdy damytý" jobasyn iske asyrý barysynda qalamgerler tómendegi taqyryptardy qamtidy:
1. Aimaqtarda jalpyhalyqtyq deńgeige shyqpaǵan ádebi-rýhani jádigerlerdi zertteý;
2. Aimaqtar tarihyna, jer-sý ataýlaryna, ańyz-afsana jáne ózge de kórkem-ádebi dúniesine arnap kórkem shyǵarma (óleń, poema, ballada, áńgime, hikaia, roman, spektakl, balalarǵa arnalǵan shyǵarmalar) jazyp, jaryqqa shyǵarý;
3. Táýelsizdik alǵannan bergi óńirlerde bolyp jatqan mádeni-áleýmettik oń ózgerister týraly jańa kózqaraspen pýblitsistikalyq, poetikalyq, prozalyq shyǵarmalar jazý úshin materialdar jinaý;
4. Qazaqstannyń klassikalyq kórkem shyǵarmalaryndaǵy tarihi oryndar men atamekenderdiń búgingi hal-kúiin zerttep, jańa materialdar jinaý;
5. Qazaqstanda ár jylda jazylǵan shyǵarmalardyń ádebi kartasyn jasaý.
6. El aralap kelgen aqyn-jazýshylardyń jinaǵan materialdary boiynsha jańa kórkem shyǵarmalar jazý.
Atalǵan jobany Jazýshylar odaǵy oblystarmen birlese otyryp júzege asyrady, Mádeniet jáne sport ministrliginiń qadaǵalaýynda bolady.
R.S. Bul eńbekter jobanyń sońǵy kezeńinde jeke-jeke kitap bop jaryq kórip, halyqtyń igiligine usynylady.
Almas Temirbai,
Qazaqstan Jazýshylar odaǵynyń
Aqmola oblystyq filialynyń direktory
