_d_850.jpg)
Instagram jelisindegi pikirde Sheshenstan basshysy Ramzan Qadyrovty "shaitan" degen jasóspirimniń ákesi men basqa týystary odan keshirim surady. Keshirim suraǵan videony "Groznyi" memlekettik telearnasy kórsetti.
15 jastaǵy oqýshynyń ákesi ulyn "durys tárbielemegeni úshin" keshirim ótinip, balasyn jaqsylap tárbieleýge ýáde berdi. Ákesi keshirim surap jatqanda bala onyń janynda otyrdy.
Telearnada jariialanǵan rolikte balanyń týysymyz degen bes erkek "inisiniń áreketi úshin uialatynyn" aitady. Olar kameraǵa qaramai, betin jasyryp otyrdy.
"Groznyi" telearnasynyń tilshisiniń sózinshe, jasóspirim Daǵystanda týǵan, qazir ákesimen Máskeý mańyndaǵy Chehov qalasynda turady.
17 mamyrda Qadyrov Instagram jelisinde tikelei efirge shyǵyp otyrǵanda ózin "shaitan" dep ataǵan adamǵa "seni taýyp, kózińdi qurtamyn" degen.
Sheshenstanda Qadyrovty synaǵan adamdardy ia olardyń týystarynyń telearnaǵa shyǵaryp keshirim suratý qalypty jaǵdaiǵa ainalyp ketti.
Máselen, bilik bergen azyq-túlik qorabynda nan men qyzanaq ǵana bolǵanyn aitqan turǵyn da jurttyń kózinshe bilikten keshirim suraǵan. 16 jastaǵy Magomed esimdi turǵyn jelide Qadyrovty "durys adam emes" degeni úshin telearnaǵa shyqqan. Ol anasy ekeýi Qadyrovtan keshirim suraǵan edi. Olar týraly video 46 minýtqa sozylǵan.
