Sheshenstan basshysy Ramzan Qadyrov respýblika áskeri eger Kreml talap etse, Siriiadaǵy "silimtikterge" qarsy qýana soǵysatynyn málimdedi. Bul týraly ol reseilik BAQ-tyń Siriiaǵa ondaǵy Resei áýe bazasyn qorǵaý úshin sheshenstandyq eki arnaiy batalony jiberiletini týraly aqparyna orai aitty.
Qadyrov Siriiaǵa ásker jiberiletini týraly aqparatty rastamady, biraq Instagram-daǵy akkaýntynda Sheshenstanda ornalasqan áskerilerdiń Siriiaǵa barýǵa qýana kelisetinin aitty. "Resei prezidenti Vladimir Pýtin buiyrsa Siriiaǵa azǵyndarmen soǵysýǵa maqtanyshpen baratyn edim. Jaýdy bizdiń jerimizge jetkizbei óz apanynda joiý kerek" dep jazdy Qadyrov.
Resei Siriia prezidenti Bashar Asadty qoldap Siriiaǵa 2015 jyldyń qyrkúieginen beri áýeden shabýyl jasap keledi. Reseidiń áskeri qoldaýy Asad áskeriniń kóterilisshilerge soqqy berip, territoriialaryn qaitaryp alýyna, onyń ishinde Aleppo qalasyn azat etýine múmkindik týdyryp jatyr.
Qadyrov buǵan deiin ózi men áskerin "Pýtinniń sarbazdary" dep ataǵan. Osy jyldyń basynda Qadyrov memlekettik telearnanyń efirinen "óz adamdaryn" Siriiaǵa barlaý málimetterin jinaý úshin "Islam memleketi" ekstremistik uiymynyń qataryna enýge jibergenin málimdegen.
