Qazaqstannyń balalar quqyǵyn qorǵaý júiesine birqatar ózgeris engizý qajet. Bul týraly búgin Aqordada Memleket basshysy Qasym-Jomart Toqaevtyń Prezidenttik kadr rezervine engen jastarmen kezdesýinde «Óskemen qalalyq bilim bólimi» memlekettik mekemesi Qamqorshylyq jáne qorǵanshylyq organy, balalardyń quqyqtaryn qorǵaý sektorynyń meńgerýshisi Iýliia Ovechkina aitty, dep habarlaidy QazAqparat.
«Balalar quqyǵyn qorǵaý júiesine birqatar ózgeris engizýdi usynamyn. Birinshiden, biz jumysymyzda aldyn alý sharalaryna basymdyq berýimiz qajet. Saldaryn joiý emes, daǵdarysty jaittyń týyndaityndyǵyn eskertý mańyzdy. Bul nashar otbasylar sanyn aitarlyqtai qysqartýǵa múmkindik beredi», - dedi Prezidenttik kadr rezervine engen Iu.Ovechkina.
Onyń aitýynsha, ekinshiden, balalar quqyǵyn qorǵaý, turmystyq zorlyq-zombylyq, balalar sýitsidi, jasóspirimder arasyndaǵy quqyq buzýshylyq, barlyq otbasynyń áleýmettik ál-aýqaty máselelerimen ailanysatyn barlyq ókiletti organdardyń ózara is-qimylyn kúsheitken jón.
«Úshinshiden, erte monitoringileýdiń tiimdi júiesin qalyptastyrý mańyzdy. Ol táýekel aimaǵynda turǵan otbasylardy erte kezeńde anyqtaýǵa jáne olardyń ómirlik qiyn jaǵdaiǵa dýshar bolmaýyna múmkindik berýi tiis. Tórtinshiden, balalardyń quqyqtaryn qorǵaý máselelerimen daiyndalǵan ári bilikti, balalar psihologiiasy men otbasylyq janjal salasynda bilimi bar mamandar ǵana ainalysýy tiis. Osy usynystar balalar quqyqtarynyń buzylý faktilerin joiýǵa, qazaqstandyq otbasylardyń problemalaryn tiimdi sheshýge jáne ókiletti organdardaǵy biýrokratiiadan arylýǵa múmkindik beredi», - dedi Iýliia Ovechkina.
