Osy qysyltaiań shaqtan halyq bolyp shydap ótsek, arty jaqsylyqqa ulasary daýsyz. Jasy seksenge taiap qalǵan jazýshy, Qazaqstannyń eńbek sińirgen qairatkeri Kádirbek Segizbai el ishinde taraǵan indet qateri kezinde osyndai pikir bildirip, eldi sabyrǵa shaqyrdy, dep habarlaidy QazAqparat
«Bul adamnan kelgen synaq pa, álde Alladan kelgen synaq pa – jip taǵyp bile almaimyz. Qazir qazbalap oqyp, kóre berseń «jer betinde adamdar kóbeiip ketti, qaitsek azaitamyz» degen áńgimelerdiń de sheti shyǵady. Alla saqtasyn. Ekinshi jaǵynan muny adam jasady dep oilai almaimyz. Bul – jer betine kelgen synaqtyń bir úlken túri. Ásirese mektepke baryp, oiyn oinap júrgen jas balalarǵa qiyndaý tiip otyrǵany ras. Qalai bolǵanda da búgin bala-shaǵa, kári-jas bolyp, buǵyp úide otyrmyz. Degenmen Allanyń peiili keń. Amandyq bolsa bul indetten de qutylarmyz. Túbi bir jaqsylyq bolar dep oilaimyz», - deidi jazýshy QazAqparat tilshisine.
Kádirbek Segizbai saǵat saiyn teledidarǵa úńilip, qurbandyqtyń bolmaýyn tilep otyrǵanyn aitady.
«Naýqastar men kisi ólimi kóbeimei, aýyzdyqtalar dep tilep otyrmyz. Meniń eń birinshi yrza bolatynym – meditsina men politsiia qyzmetkerleri kún-tún demei, halyqtyń qorǵany bolyp tur ǵoi. Olardy túsinbeitin, qashyp-pysyp qaladan kirip jatqandar da bar. Qalai bolǵanda da olardy durystap jazalaý kerek! Óitkeni ondai adam ózi ǵana aýyryp qoimai, aǵaiyny men týǵan-týystaryna, kerek bolsa búkil halyqqa qaýip tóndiredi», - deidi ol.
Jazýshy «jut jeti aǵaiyndy» degendei indettiń taralýymen birge el ekonomikasy iek artyp otyrǵanyn munai baǵasynyń quldyraýyna qatysty da pikirin bildirdi.
«Koronavirýspen birge alpaýyt memleketterdiń bir-birimen kelise almaýy da álemdik ekonomikaǵa qalai áser etip jatqanyn oqyp, kórip, bilip otyrsyzdar. Bul jaǵdai bizdiń eldiń kirisin meilinshe azaityp otyr. Buǵan da tózý kerek. Qazaq halqy ne kórmegen?! Bastan talai-talai qiynshylyqtardy ótkergen, «myń ólip, myń tirilgen» dep Juban aǵamyz aitqandai asharshylyq pen joqshylyqty da kórgen elmiz. Jerdiń astyndaǵy qazynaǵa qaraǵanda jerdiń ústindegi qazynaǵa - ǵasyrlar boiy babalarymyz jolǵa qoiǵan aýyl sharýashylyǵyna durystap kóńil bólsek deimin. Azyq-túliktiń azaiýy ázirge sezilip turǵan joq. Qorymyz bar dep jatyr. Halyqqa qajetti úles berilip, dárigerlerge kóterme aqy tabystalýda. Osynyń bári de der kezinde jasalyp jatqan sharýa dep oilaimyn. Ásirese politsiia qyzmetkerleriniń uiqy-kúlki kórmei, qala shetin kúzetip, kóshelerdi aralap júrgeniniń bári – halyq úshin jasap jatqan qamqorlyq dep oilaimyn», - dedi Kádirbek Segizbai.
Aqsaqal sóz sońynda halyqqa sózin arnady.
«Bul synaqqa da shydarmyz. Seksenge taiap qalǵan adam retinde halyqqa aitarym: qai ýaqytta bolsyn úide otyryp, osy qysyltaiań shaqqa shydap ótsek, barlyq jaqsylyq artynan bolar dep oilaimyn. Halqymyz aman, jurtymyz tynysh bolsyn», - dep túidi jazýshy.
Aita keteiik, keshe Prezident Qasym-Jomart Toqaev respýblikalyq telearnalar efirinen málimdeme jasaǵan bolatyn.
.jpeg)