Belgili jazýshy, jýrnalist Kádirbek Segizbaev jurtshylyqty saqtyqqa shaqyrdy, dep habarlaidy QazAqparat.
«Bul jalǵyz qazaqqa ǵana emes, búkil álem jurtshylyǵynyń basyna tóngen úlken qasiret qoi. Jalpy men azamat bolǵaly tek ákelerimizdiń, babalarymyzdyń úlken dertterge ushyraǵanyn, oba nemese súzekti ótkergenderin jii estitinmin. Keiingi kezde meditsina ǵylymy ábden jetildi ǵoi. Mundai sumdyqtar endi bola qoimas dep oilaýshy edik. Aiaq astynan osyndai náýbet boldy. Degenmen bul náýbet – halyqtyń basyna túsken úlken syn dep aitýǵa bolady. Bylaisha aitqanda, «myltyqsyz maidan». Qazir ońymyzdan kele me, solymyzdan kele me, aspannan shyǵa ma, jerden kele me – adam bilmeidi. Áiteýir aýrý juqtyrǵan aǵaiyndar, joldas-joralar tym kóbeiip ketti. Shyǵyn da az emes. Munyń bári qalai bolǵanda da úlken qasiret», - dedi Kádirbek Segizbaev QazAqparat tilshisine telefon arqyly bildirgen pikirinde.
Jazýshy Memleket basshysy Qasym-Jomart Toqaevtyń búgingi kúndi – Jalpyulttyq aza tutý kúni dep jariialaý týraly sheshimin qoldaitynyn jetkizdi.
«Bul óte durys. Qalai bolǵanda da óli razy bolmai, tiri baiymaidy. Bizdiń keshe ǵana qasymyzda júrgen azamattar, joldas-joralarymyz o dúnielik bolyp jatyr. Munyń bári myltyqsyz maidannyń qurbandary. Muny anaý jasapty, mynaý jasapty dep kinálaýǵa bolmas. Bul virýs múmkin tabiǵi, bálkim jasandy shyǵar. Qalai bolǵanda da biraz azamattarymyzdyń qaitys bolyp jatqany ras. Marqumdardyń jatqan jeri jaily, topyraǵy torqa bolsyn», - degen jazýshy kóz jumǵan azamattardyń artynda qalǵan bala-shaǵasyna, joldas-joralaryna amandyq tiledi.
Kádirbek Segizbaev óz sózinde jurtshylyqty saq bolýǵa shaqyrdy.
«Bul náýbetten kún ysyǵanda nemese kún sýyǵanda qutylamyz degen áńgime shyqty. Munyń bári bir Allanyń qolynda shyǵar. Qalai bolǵanda da budan qutylarymyz ras. Qazir búkil álem bolyp indetke qarsy áreketter jasalyp jatyr. Sol sebepti úmitimiz esh ýaqytta azaimaidy. Biz el bolyp, jurt bolyp, budan da qutylamyz», - dedi ol.
Jazýshy kópshiliktiń saqtyq sharalaryn saqtai bermeitinin ókinishpen aityp ótti.
«Toi-tomalaq, qaza bolǵandardy janazalap shyǵaryp salý, toptalyp barý degender – aýrýdyń juǵýyna birden-bir sebep bolyp otyr. Sondyqtan halqymyzdy sabyrǵa shaqyrǵan durys shyǵar. Árbirimiz qazir óz basymyzdy oilamaiyq. Bul aýrýdyń keseli qiyn kórinedi. Ár adam ózin saqtasa – aǵaiyndaryn da saqtaidy degen sóz. Jaqynyna janashyr bolý degen osydan shyǵady dep oilaimyn. Sondai-aq osyndai náýbet kezinde, halyqtyń basyna qasiret túsip turǵan ýaqytta keibir paidaqor usaq adamdardyń dári-dármekti alyp qymbatqa satýy, saýdagerlik jasaýy – bizdiń qazaq úshin jaraspaityn úlken min dep sanaimyn. Úkimettiń bul jaǵdaidy qaita-qaita eskertip aityp jatýy oryndy sharýa. «Aiýǵa namaz úiretken» taiaq deidi. Mundai ospadarlardy aiamai jazalaý kerek. Onsyz da jegishtik, jemqorlyq áýrege salyp turǵan kezde náýbetke náýbet qosýǵa bolmaidy. Elimiz aman, jurtymyz tynysh bolsyn, aǵaiyn», - dep túidi Kádirbek Segizbaev.
