8 mamyrda tústen keiin Aýǵanstan astanasy Kabýl qalasynyń batysyndaǵy ul jáne qyz balalar birge oqityn mektep janynda jarylys boldy. 30 shaqty adam qaza taýyp, 50-den astamy jaralanǵan. Kóbiniń jasy 11 men 15 aralyǵynda. Aýǵanstan ishki ister ministrliginiń ókili qaza bolǵandar budan da kóp bolýy múmkin ekenin aitady.
AQSh memlekettik departamenti Kabýldaǵy mektep janynda jasalǵan jarylysty aiyptap, aýǵan halqyna qoldaý bildiretinin málimdedi.
Aýǵanstan bilim ministrligi ókiliniń Reuters agenttigine habarlaýynsha, jarylys úsh aýysymda oqityn mektepte ekinshi aýysym oqýshylary sabaqta otyrǵan kezde bolǵan.
Áleýmettik jelilerde taraǵan video men fotolarda mekteptiń qasynda jarylys bolǵan jerde qanǵa boialǵan oqý quraldary, jarylystan soń áýege kóterilgen tútin kórinedi.
Jarylysqa jaýapkershilikti ázirge eshkim moinyna alǵan joq.
Aýǵanstan prezidenti Ashraf Ǵani jarylysqa bailanysty "Talibandy" aiyptady, biraq oǵan tálipterdiń qatysy baryna eshqandai dálel-aiǵaq keltirgen joq. "Taliban" qozǵalysynyń ókili "buǵan tálipterdiń qatysy bolýy múmkin" degen sózdi teriske shyǵaryp, jarylysty uiymdastyrǵandardy aiyptady.
