AQSh áskerileri búgin, 26 tamyzda Kabýl áýejaiynyń mańynda úlken jarylys bolǵanyn habarlady.
Pentagonnyń resmi ókili Djon Kirbi Twitter jelisinde jarylystan adam shyǵyny bar dep málimdedi.
Reuters AQSh áskerindegi derekkózine súienip, jankeshti óz-ózin jaryp jibergenin jazdy. Budan bólek, Reuters agenttigi "Taliban" qozǵalysynyń (Qazaqstan men basqa da elderde terroristik uiym dep tanylǵan uiym) resmi ókilderine súienip, jarylystan kemi 13 adam qaitys bolǵanyn habarlady.
Buǵan deiin AQSh-tyń resmi ókilderi "jankeshti terrorist áýejaiǵa shabýyl jasaýy múmkin ekenin" eskertken.
"Taliban" qozǵalysy Aýǵanstanda bilikti qaita qolǵa alǵan soń eldegi jaǵdai ýshyqqan.
Keiingi kúnderi Kabýl áýejaiyndaǵy evakýatsiia údei tústi. AQSh pen onyń odaqtastary óz azamattary men elshilikterine qyzmet etken aýǵandardy jappai áketip jatyr. Tálipterden úreilenip, elden ketýge bel býǵan aýǵan azamattary áýejaiǵa aǵylyp, dúrligý baiqaldy.
