Kabýldaǵy Hamid Karzai áýejaiyna zymyran atqan kóliktiń qasynda turǵan "Taliban" áskeri. 30 tamyz, 2021 jyl.
Aýǵanstandaǵy AQSh azamattaryn áketý operatsiiasynyń sońǵy saǵattarynda Kabýl áýejaiyna zymyran atyldy. Aq úi bul aqparattan prezident Djo Baiden habardar ekenin, biraq operatsiia "kidirissiz júretinin" habarlady, dep jazady Azattyq.
Baiden "komandirler sol jerdegi kúshterimizdi qorǵaýǵa basymdyq berýde bar kúshin salýy tiis degen buiryǵyn qaitalady" dedi Aq úidiń baspasóz hatshysy Djen Psaki 30 tamyzdaǵy
málimdemede.
30 tamyzda Kabýl áýejaiyna birneshe zymyran baǵyttaldy. AQSh resmi ókiliniń Reuters agenttigine habarlaýynsha, áýejaiǵa ushyp kele jatqan bes zymyrandy zymyrannan qorǵanys júiesi atyp qulatqan.
Zymyrannyń barlyǵy joiyldy ma, ol jaǵy anyq emes, biraq jergilikti turǵyndar kóshege snariadtar túskenin aitqan. Oqiǵadan japa shekkender týraly aqparat joq.
Aýǵanstanda bilikti basyp alǵan "Taliban" basshylyǵymen kelisim aiasynda AQSh 31 tamyzǵa deiin eldegi barlyq kúshterin tegis alyp ketýge tyrysyp jatyr.
Tálipter Kabýldy ózine qaratqan 15 tamyzdan beri AQSh jáne onyń odaqtastary áýejaidan 117 myńnan astam adamdy alyp ketti. Qazir olar AQSh sarbazdary men diplomattaryn evakýatsiialaýǵa kúsh salyp jatyr.
Baiden de, AQSh-tyń basqa laýazymdy basshylary da Kabýldaǵy ásker áketý operatsiiasynyń sońǵy kúnderi óte qaýipti bolady dep eskertken.
29 tamyzda AQSh drony Kabýlda "Islam memleketi – Horasan" tobynyń áýejaiǵa shabýylynyń betin qaitarǵan. Bul týraly AQSh áskerileri habarlady.
Bul oqiǵadan eki kún buryn Kabýl áýejaiy mańynda "Islam memleketi – Horasan" tobynyń jankeshti terroristeri jarylys jasap, sonyń kesirinen 170 aýǵan azamaty men AQSh-tyń 13 áskeri qyzmetkeri opat boldy. 28 tamyzda AQSh-tyń drony eldiń shyǵysyndaǵy Nangarhar aimaǵyna qarymta shabýyl jasady. Pentagonnyń málimeti boiynsha, osy oqiǵa kezinde terroristik toptyń eki múshesi mert bolǵan.
AQSh pen onyń odaqtastary Aýǵanstandaǵy 20 jylǵa sozylǵan operatsiiany aiaqtap, áskerin ákete bastaǵaly "Taliban" toby qaita kúsh alyp, aimaqtardy birtindep ózine qarata bastaǵan. 15 tamyzda "Taliban" Kabýlǵa kútpegen jerden kirip, bilikti basyp aldy, zańdy sailanǵan prezident elden qashty. Sodan beri álem elderi asa konservativti dini zańdarǵa súienetin toppen qarym-qatynasqa túsýdiń joldaryn qarastyryp jatyr.
