Qazaqstannyń halyq jazýshysy Qabdesh Jumadilov elordada ótip jatqan Aziia qalamgerleriniń I forýmy qurlyq elderiniń ádebietin bir-birine nasihattaýǵa jol ashatynyna senim bildirdi, dep habarlaidy "Ult aqparat".
«1973 jyly Almatyda Aziia-Afrika elderi aqyn-jazýshylarynyń konferentsiiasy ótti. Jas kezimiz edi. Árqaisymyzdy bir-bir eldiń delegatsiiasyn kútip alýǵa mindettep qoiǵan. Men Kendzabýro Oe bastaǵan japon jazýshylaryn kútip aldym. Elge attanǵansha basy-qasynda boldym. Ol Ánýar Álimjanovtyń basshylyǵynda jasalǵan shara edi. Al endi bul forým 46 jyldan keiin ótkizilip otyr. Óte qajet. Jazýshylar odaǵynyń jańa basshylyǵy bastama kóterip, Úkimet qoldap, Aziia jazýshylaryn jinady. Bul - óte mańyzdy jiyn. Bas qosý kerek. Tájiribe almasý kerek», - dedi Qabdesh Jumadilov forým kezinde tilshilerdiń suraǵyna jaýap bere otyryp.
Jazýshynyń aitýynsha, Aziia elderiniń aqyn-jazýshylary bir-birine tól ádebietterin nasihattaýy tiis.
«Bir-birimizdi nasihattaýymyz kerek. Mysaly, qazaq ádebieti nasihat jaǵynan kenje. Aýdarylý jaǵynan da sol. Imperiia tusynda bes-alty ǵana nomenklatýralyq jazýshylar aýdarylattyn. Basqalarǵa shek qoiyldy. Endi qazir táýelsizdikten keiin Qudaiǵa shúkir, búkil Aziia jazýshylaryn jinap, basyn qosyp jatyrmyz. Olardy biz nasihattaýymyz kerek. Qazaq ádebietin olar nasihattaýy kerek. Búgingi forýmnyń bizge bereri osy ǵoi deimin», - dedi Qabdesh Jumadilov.
