قازاقستاننىڭ حالىق جازۋشىسى قابدەش جۇمادٸلوۆ ەلوردادا ٶتٸپ جاتقان ازييا قالامگەرلەرٸنٸڭ ٸ فورۋمى قۇرلىق ەلدەرٸنٸڭ ەدەبيەتٸن بٸر-بٸرٸنە ناسيحاتتاۋعا جول اشاتىنىنا سەنٸم بٸلدٸردٸ, دەپ حابارلايدى "ۇلت اقپارات".
«1973 جىلى الماتىدا ازييا-افريكا ەلدەرٸ اقىن-جازۋشىلارىنىڭ كونفەرەنتسيياسى ٶتتٸ. جاس كەزٸمٸز ەدٸ. ەرقايسىمىزدى بٸر-بٸر ەلدٸڭ دەلەگاتسيياسىن كٷتٸپ الۋعا مٸندەتتەپ قويعان. مەن كەندزابۋرو وە باستاعان جاپون جازۋشىلارىن كٷتٸپ الدىم. ەلگە اتتانعانشا باسى-قاسىندا بولدىم. ول ەنۋار ەلٸمجانوۆتىڭ باسشىلىعىندا جاسالعان شارا ەدٸ. ال ەندٸ بۇل فورۋم 46 جىلدان كەيٸن ٶتكٸزٸلٸپ وتىر. ٶتە قاجەت. جازۋشىلار وداعىنىڭ جاڭا باسشىلىعى باستاما كٶتەرٸپ, ٷكٸمەت قولداپ, ازييا جازۋشىلارىن جينادى. بۇل - ٶتە ماڭىزدى جيىن. باس قوسۋ كەرەك. تەجٸريبە الماسۋ كەرەك», - دەدٸ قابدەش جۇمادٸلوۆ فورۋم كەزٸندە تٸلشٸلەردٸڭ سۇراعىنا جاۋاپ بەرە وتىرىپ.
جازۋشىنىڭ ايتۋىنشا, ازييا ەلدەرٸنٸڭ اقىن-جازۋشىلارى بٸر-بٸرٸنە تٶل ەدەبيەتتەرٸن ناسيحاتتاۋى تيٸس.
«بٸر-بٸرٸمٸزدٸ ناسيحاتتاۋىمىز كەرەك. مىسالى, قازاق ەدەبيەتٸ ناسيحات جاعىنان كەنجە. اۋدارىلۋ جاعىنان دا سول. يمپەرييا تۇسىندا بەس-التى عانا نومەنكلاتۋرالىق جازۋشىلار اۋدارىلاتتىن. باسقالارعا شەك قويىلدى. ەندٸ قازٸر تەۋەلسٸزدٸكتەن كەيٸن قۇدايعا شٷكٸر, بٷكٸل ازييا جازۋشىلارىن جيناپ, باسىن قوسىپ جاتىرمىز. ولاردى بٸز ناسيحاتتاۋىمىز كەرەك. قازاق ەدەبيەتٸن ولار ناسيحاتتاۋى كەرەك. بٷگٸنگٸ فورۋمنىڭ بٸزگە بەرەرٸ وسى عوي دەيمٸن», - دەدٸ قابدەش جۇمادٸلوۆ.
