29 qarasha kúni onlain formatta «Junior Eurovision» tanymal mýzykalyq baiqaýy ótedi. Onda Qazaqstan atynan Qaraqat Bashanova óner kórsetedi. Baiqaýdy «Habar» telearnasy tikelei efirde kórsetedi. Bastalýy – saǵat 22.00-de, dep habarlaidy "Ult aqparat".
«Biyl biz 11 eldiń qatysýshylarymen báigege túskeli otyrmyz. Olardyń arasynda 3 ret jeń iske jetkender de bar. Mysaly, Grýziia. Al, Malta, Belarýs, Resei, Polsha siiaqty elder 2 ret jeńimpaz atanyp úlgergen. Biylǵy jyl – bizdiń jeńisti jylymyz bolýy kerek dep oilaimyn. Qaraqattyń jeńiske jetýi úshin barlyq múmkindigi bar», - dedi aldaǵy halyqaralyq baiqaýdyń finalyna arnalǵan baspasóz máslihatynda «Habar» Agenttiginiń basqarma tóraǵasy Erlan Bekhojin.
Brifingige «Habar» Agenttiginiń basshylyǵymen qatar, Qaraqat Bashanova jáne mýzykalyq saiysta aitylatyn ándi jazǵan belgili sazger Hamit Shanǵaliev qatysty.
«Junior Eurovision» baiqaýynyń ashylý saltanatynda ótken jyly jeńimpaz atanǵan poliak ánshisi Viki Gabor ár eldiń óner kórsetetin rettik nómirin anyqtady. Nátijesinde, Qaraqat «Forever» ánin ekinshi bolyp, iaǵni germaniialyq qatysýshynyń qoiylymynan keiin oryndaityny belgili boldy. Barlyǵy virtýaldy sahnada 12 qatysýshy baq synaityn bolady.
Jarystyń erejesi boiynsha, jeńimpaz ádil qazylar alqasy músheleriniń daýys berýi jáne 2 kezeńde ótetin onlain-daýys berý arqyly anyqtalady.
Qazaqstandyqtar Qaraqatqa ǵana emes, sondai-aq basqa elderdiń qatysýshylaryna da daýys berýdiń biregei múmkindigine ie. Kórermenderdiń daýys berýi junioreurovision.tv saitynda ótedi. Daýys berý 28-shi qarashadan 29-shy qarasha aralyǵynda konkýrstyń finaly bastalǵanǵa deiin jalǵasady. Final aiaqtalǵannan keiin, kórermenderdiń ózderiniń súiikti ánshileri úshin daýys berýi úshin taǵy 15 minýt ýaqyt beriledi.
Daýys berý jáne baiqaý týraly tolyǵyraq aqparatty silteme boiynsha bilýge bolady.
Aita keteiik, eresekter arasynda ótetin «Evrovideniege» qaraǵanda, Junior Eurovision. án baiqaýynyń jeńimpazy bolǵan el kelesi jylǵy baiqaýdy óz jerinde ótkizý quqyǵyn avtomatty túrde ielenbeidi.
- · Eresekter arasynda ótetin «Evrovidenieniń» taǵy bir aiyrmashylyǵy, Junior Eurovision án baiqaýyna qatysýshy elderge óz ókilderin qoldaýǵa ruqsat etiledi. 18-shi Junior Eurovision án baiqaýynyń jeńimpazy qazylar alqasynyń daýys berýi jáne onlain-daýys berý arqyly anyqtalady. Daýys berý júiesi dástúrli negizde: 50% qazylar alqasynyń sheshimi jáne 50% onlain daýys berý nátijesine bailanysty. Onlain daýys berý junioreurovision.tv saitynda 2 kezeńde ótedi. Daýys berýdiń birinshi kezeńi 28 qarasha kúni saǵat 01:00-de ashylady jáne 29 qarasha kúni konkýrs finalynyń tikelei kórsetilimi bastalǵanǵa deiin jalǵasady. Daýys berýdiń ekinshi kezeńi barlyq qatysýshylardyń mýzykalyq qoiylymynan keiin bastalyp, 15 minýtqa sozylady.
- · Qazaqstan Junior Eurovision án baiqaýyna alǵash ret 2018 jyly qatysty. Onda Daneliia Tóleshova «Ózińe sen» ánimen altynshy orynǵa ie boldy. 2019 jyly Erjan Maksim «Armanyńnan qalma» ánimen ekinshi oryndy (qazylar alqasynyń sheshimi boiynsha birinshi) ielendi. Qazaqstannyń bul halyqaralyq baiqaýǵa úshinshi ret qatysýy «Habar» Agenttiginiń Eýropalyq habar taratý odaǵynyń (EBU) qaýymdasqan múshesi bolýynyń arqasynda múmkin boldy.
- · «Junior Eurovision Song Contest» alǵash ret 2003 jyly Kopengagende (Daniia) 16 eldiń qatysýshylarymen ótkizildi. Telekórermender jáne qazylar alqasynyń jeńimpazdy birlesip anyqtaý rásimi 2008 jyldan bastaý alady. Ol ýaqytqa deiin daýys berýdi kórermender tikelei kórsetilim kezinde júzege asyrdy. 2007 jáne 2008 jyldardaǵy saiystarda televiziialyq daýys berýden túsken paida «UNICEF» – ke tapsyryldy. .
- · 8 qazan kúni «Junior Eurovision» baiqaýynyń resmi saitynda Qaraqat Bashanovanyń «Forever» atty ánine túsirilgen beinebaiany jariialandy.. Jobanyń avtory - belgili qazaqstandyq stsenarist jáne rejisser Málik Zenger. Tarihi ózgeshelikterdi eskere otyryp, kiimderdi egjei-tegjeili oilastyrýmen tanymal stilist Anarbek Járdemov bastaǵan «Qazaqfilm» AQ mamandary ainalysty. Túsirilim Almaty qalasynda ótti.
- · 2020 jylǵy Junior Eurovision baiqaýyna Belarýs, Frantsiia, Grýziia, Qazaqstan, Malta, Niderlandy, Resei, Serbiia, Ispaniia, Ýkraina, Polsha jáne Germaniia elderiniń ókilderi qatysady.
