Amerikalyq Johnson & Johnson kompaniiasy eriktilerdiń biriniń "belgisiz aýrýǵa" shaldyǵýyna bailanysty koronavirýs vaktsinasyn synaqtan ótkizýdi ýaqytsha toqtatty. AQSh-ta shoǵyrlanǵan alyp kompaniia ázirlep jatqan koronavirýs vaktsinasy álemde qoldanysqa ený yqtimaldyǵy joǵary ekpelerdiń biri sanalady.
Kompaniia taratqan habarlamada "zertteýge qatysýshydan belgisiz aýrýdyń paida bolýyna bailanysty" synaqtyń ýaqytsha toqtatylǵany jazylǵan. Kompaniia ókilderiniń pikirinshe, myńdaǵan adam qatysatyn iri zertteý kezinde mundai oqiǵalardyń bolýy qalypty qubylys. Kompaniia "zertteýdegi úzilis" pen densaýlyq saqtaý salasynyń biligi qoiatyn "normativtik tyiym" arasynda úlken aiyrmashylyq baryn da atap ótedi. Johnson & Johnson synaqqa qatýshy jaily basqa málimet bermegen.
Buǵan deiin AstraZeneca kompaniiasy da osyǵan uqsas sebeppen synaqty toqtatqan bolatyn. Ulybritaniia, Braziliia, Ońtústik Afrika jáne Úndistan koronavirýs vaktsinasyn synaqtan ótkizýdi jalǵastyryp jatyr.
Qyrkúiek aiynda Johnson & Johnson kompaniiasy klinikalyq synaqtyń bastapqy jáne orta kezeńinde COVID-19 vaktsinasynyń koronavirýstan qorǵaityn myqty immýnitet qalyptastyrýǵa qabileti bar ekenin málimdegen edi. Izinshe kompaniia 60 myń adam qatysatyn iri synaqty bastaǵan.
Johnson & Johnson koronavirýs vaktsinasyn synaqtan ótkizýdiń úshinshi kezeńine ótken AQSh-taǵy tórtinshi kompaniia.
