«Jas Otan» Jastar qanatynyń tóraǵasy Nurjan Jetpisbaev «Nur Otan» pariiasynyń «Amanat» bolyp ózgerýine bailanysty pikir bildirdi , dep habarlaidy QazAqparat.
«Ózderińizge belgili, «Nur Otan»-nyń kezekten tys ótken sezinde partiia ataýyn aýystyrý týraly usynys aitylyp, Memleket basshysy-partiia Tóraǵasy Qasym-Jomart Kemeluly «Amanat» bolyp ózgerýin qoldady. Bul jai ǵana ataýdyń ózgerýi emes, tolyqtai jumystyń jańarýy, jańǵyrýy dep bilemin.
Al «Jas Otan»-ǵa keler bolsaq, osyǵan bailanysty bizge elimizdiń túkpir-túkpirinen túrli usynystar túsýde. Bes saýsaq birdei emes qoi, sol siiaqty jasotandyqtardyń bir bóligi atyn aýystyraiyq dese, ekinshisi burynǵy ataý qalsyn degen pikirde. Jastardyń pikirin elep-eskerý biz úshin birinshi orynda. Sondyqtan, barlyq usynystarmen túbegeili tanysyp, oqi kele naqty sheshimge keletin bolamyz. Bul týraly aldaǵy ýaqytta ótetin «Jas Otan»-nyń forýmynda jariialaimyz dep josparlap otyrmyz», - dedi «Jas Otan» Jastar qanatynyń tóraǵasy.
Sondai-aq ol jastar qanatynyń qataryn jańartyp, tolyqtyrý boiynsha birqatar jumys atqarylyp jatqanyn atady.
«Qatarymyzdy jastardyń arasynda kósh bastap júrgen, ózindik qoǵamdyq pikirge ie, airyqsha potentsialdy adamdarmen tolyqtaratyn bolamyz. Aýyl jastaryn jáne áleýmettendirýdi qajet etetin jastardy tartý – basty mindetterdiń biri desem qatelespeimin.
Memlekettik jastar saiasaty týraly zańnyń kúshi men áreket etý aýqymynyń tar ekeni burynnan málim. Alaida jastardyń tarapynan bul máseleni sheshýge qatysty usynystar eskerilmei jatqany da daýsyz. Jahandaný jaǵdaiynda jastarymyzdyń damyp jetilýine, ýaqytyn durys uiymdastyryp, potentsialyn durys arnaǵa baǵyttamasaq, biz olardy joǵaltyp alýymyz ábden múmkin. Al ózgerister kezeńinde jańa kadrlar, óz isiniń jas mamandary, elimizdiń erteńin senip tapsyra alatyn kóshbasshylardy tárbieleý erekshe mańyzǵa ie», - dedi Nurjan Jetpisbaev.
Eske salaiyq, 1 naýryz kúni ótken sez barysynda «Nur Otan» partiiasynyń ataýyn «Amanat» dep ózgertý týraly sheshim qabyldandy. Búgin «Amanat» partiiasy qaita tirkeýden ótkeni málim etildi.
