Iziým mańyndaǵy ormannan tabylǵan zirat. 15 qyrkúiek 2022 jyl.
Ýkrainanyń Harkov oblysy Iziým qalasynan Resei armiiasy ketkennen keiin shamamen 440 adam jerlengen zirat tabyldy. Bul jóninde Harkov oblysy tergeý basqarmasynyń bastyǵy Sergei Bolvinovke súiengen Sky News agenttigi habarlady.
Onyń aitýynsha, barlyq máiitke eksgýmatsiia jasalyp, sot-meditsina saraptamasyna jiberiledi.
"Nastoiashee vremia" arnasy Iziým ormanyndaǵy zirattyń sýretin jariialady. Telearnaǵa sýretti ýkrain tilshileri bergen.
Keibir qabirden gúl shoǵyryn da kórýge bolady. Keibirinde "VSÝ, 17 chelovek, s morga" (Ýkraina qarýly kúshteri, 17 adam, máiithanadan), "345", "412" degen jazýlar bar. "Nastoiashee vremia" arnasynyń jazýynsha, iz-túzsiz joǵalǵandar máselesi boiynsha ýákil Oleg Kotenko sýretterdiń túpnusqa ekenin rastaǵan.
Telearnaǵa bergen suhbatynda ol ýkrain jaǵy zirattar týraly aqparatty Resei áskeri jariialaǵan videolardan bilgenin aitty. Kotenkonyń aitýynsha, munda júzdegen adam jerlengen.
"Okkýpanttardyń Iziýmge keltirgen shyǵynyn túsindirgen Ýkraina biligi ony eki "Borodiankaǵa" teńedi. Adam shyǵyny jaǵynan "eki Býchamen para-par" dedi ol.
Buǵan deiin Iziýmde keminde myń beibit turǵynnyń qaitys bolǵanyn Iziým qalalyq keńesiniń depýtaty Maksim Strelnikov habarlaǵan.
"Qolda bar aqparatqa sáikes, keminde myń jergilikti turǵyn áskeri qimyldardyń saldarynan qaza bolǵan. Ókinishke qarai, zardap shekkender odan da kóp, sebebi olarǵa ýaqytynda meditsinalyq kómek kórsete almadyq. Reseilik okkýpanttar naýryz aiynda Iziýmdegi barlyq meditsina mekemeleriniń kózin joiǵan" dedi depýtat.
10 qyrkúiekte Ýkraina armiiasy Iziým qalasy men ondaǵan eldi mekendi Resei armiiasynan azat etken. Orys armiiasy Harkov oblysynyń soltústik aýdandarynan tyqsyrylǵan. Resei qorǵanys ministrligi orys armiiasynyń Balaklei men Iziýmnan ketýin "dislokatsiia" dep túsindirdi.
Iziým qalasy 2022 jyly aqpan aiynda soǵystyń saldarynan tutac qiraǵan. Onda qalǵan turǵyndar jaryq, gaz jáne jylytý júielerinen ajyrap qalǵan.
Sáýir aiynda orys armiiasy Iziýmdi tolyq basyp alǵan. Jergilikti biliktiń habarlaýynsha, Iziýmde soǵys bastalǵaly beri myńnan astam beibit turǵyn qaza bolǵan. Edáýir bóligi jaralanǵan. Soǵysqa deiin 46 myń turǵyny bolǵan qalada soǵystan keiin 10 myń adam ǵana qalǵan.
