«Ál-Jazira» telearnasynyń jýrnalisi Iordan ózeniniń Batys jaǵalaýyndaǵy Djenin qalasynda Izrail júrgizip jatqan reid kezinde oqqa ushty, dep habarlaidy QazAqparat agenttigi AR-ǵa silteme jasap.
Oqiǵa sársenbi kúni tańerteń bolǵan. Palestinalyq jýrnalist ári telearna reporteri Shirin Abý Aklege oq tiip, kóp uzamai qaitys bolǵan. Taǵy bir telearna jýrnalisi — palestinalyq Ali Samýdi arqasynan jaraqat alyp, aýrýhanaǵa tústi. Onyń jaǵdaiy turaqty.
«Palestina Densaýlyq saqtaý ministrliginiń habarlaýynsha, Shirinniń basyna oq tigen. Ol aýrýhanaǵa aýyr jaǵdaida jetkizildi, keiinirek dárigerler onyń qaitys bolǵanyn jariialady» dep habarlaidy WAFA Palestina agenttigi.
Óz kezeginde Izrail biligi tergeýdi bastady jáne jýrnalist Palestina tarapynan atylǵan oqtan qaza bolýy múmkin ekenin joqqa shyǵarmaidy.
Telearnanyń habarlaýynsha, Izrail sarbazdary Shirinniń reportaj kezinde basqa adamdardan erekshelenetin «press-kúrteshe» kigenine qaramastan, oǵan oq jaýdyrǵan. Izrail áskerileri Djenindegi operatsiia kezinde ózderine jarylǵysh zattar men oq atylǵandyqtan, olarǵa «jaýap qaitarǵanyn» habarlady. Áskeriler «bul oqiǵany zerttep, jýrnalisterdi palestinalyq sodyrlar jaralaǵan degen boljamdy zerttep jatyrmyz» dedi.
