Izrail juma kúninen bastap koronavirýstyń ekinshi tolqynynan keiin indettiń taralýyn boldyrmaý úshin úsh aptalyq qatań karantin engizedi.
Bul týraly eldiń Premer-ministri Beniamin Netaniahý málim etken, dep habarlaidy Reuters agenttigi.
Ulttyq meiramdar qarsańyna tuspa-tus kelgen karantin ýaqytynda el azamattaryna úilerinen 500 metrden astam qashyqtyqta júrýge tyiym salynady, biraq olar shekteýli rejimde jumys isteitin keńselerge bara alady.
Mektepter men saýda ortalyqtary jabylady, tek sýpermarketter men dárihanalar jumys isteidi. Úkimettik uiymdar qysqartylǵan quramda jumys isteitin bolady, al klienttermen jumys istemeitin memlekettik emes agenttikter men kásiporyndar ashyq bolady.
Qarjy ministrligi oqshaýlaý koronavirýstyń saldarynan retsessiiaǵa ushyraǵan ekonomikaǵa shamamen 6,5 milliard shekel (1,88 milliard dollar) shyǵyn ákeledi dep málimdedi.
Netaniahý Qarjy ministrine karantinnen zardap shekken kásiporyndarǵa kómektesý úshin jańa ekonomikalyq paket ázirleýdi tapsyrǵanyn aitty.
Aýrý juqtyrǵandar sany kúrt artyp, ótken aptada 4000-nan asty, senbi kúni 2 715 adam indetke shaldyqqan. Pandemiia bastalǵannan beri Izrailde 1 108 adam qaitys boldy.
Netaniahýdyń aitýynsha, bul alańdatarlyq jaǵdai boldy jáne úkimetti áreket etýge itermeledi.
Densaýlyq saqtaý ministrliginiń basshysy Hezi Levi jeksenbi kúni radio suhbatynda qatań shekteýler engizý kerek dep málimdedi. Bul sharalar eldegi virýstyń jańa tolqynyn toqtata alady.
