30 shilde kúni Oman jaǵalaýynda Izrailge tiesili munai tankerine jasalǵan shabýyl saldarynan ekipajdyń eki múshesi qaza bolǵan. Izrail bul oqiǵaǵa bailanysty Irandy aiyptap otyr. Izrail milliarderi Eial Oferdiń Zodiac Group kompaniialar tobynyń quramyna kiretin Zodiac Maritime kompaniiasy (Londonda ornalasqan) 29 shildede Liberiia jalaýyn taǵyp qyzmet atqaratyn, japondar menshigindegi Mercer Street tankerine shabýyl jasalǵanyn habarlaǵan.
Bul oqiǵanyń egjei-tegjeii jaily tolyq málimet áli taratylmady, biraq shabýyl barysynda Rýmyniia azamaty men Ulybritaniia azamatynyń kóz jumǵany belgili boldy. Izrail syrtqy ister ministri Iair Lapid shabýylǵa Irandy kinálap, Ulybritaniia syrtqy ister ministrine bul oqiǵaǵa bailanysty qatań shara qoldaný qajetin aitqanyn málimdedi.
"Iran – tek Izraildiń ǵana beineti emes, bárimizge ziian keltiretin terrorizmdi, búlinshilik pen turaqsyzdyqty eksporttaidy. Álem jurtshylyǵy teńiz aidynynda kemelerdiń erkin júzýine de ziian keltirip otyrǵan Iran terrorizmine qatysty únsiz qalmaýy kerek" dedi Lapid málimdemesinde.
Tegeran byltyr iadrolyq zertteýlermen ainalysatyn Iran ǵalymynyń qazasynyń jáne óziniń iadrolyq qondyrǵylaryna jasalǵan shabýyldardyń artynda tur dep Izraildi aiyptaǵan. Iran biligi Iair Lapidtiń málimdemesine bailanysty ázirge reaktsiia bildirgen joq.
Iran úkimetiniń arab tilinde habar taratatyn Al Alam telearnasy aty-jóni atalmaǵan derekkózderge súienip, bul jolǵy shabýyl ótkende Siriiadaǵy áýejaiǵa berilgen soqqyǵa bailanysty kúdikke ilingen Izrailge jaýap bolyp sanalady degen aqpar taratty. Izraildiń odaqtasy esepteletin AQSh bul oqiǵaǵa alańdap, jaǵdaidy jiti baqylap otyrǵanyn málimdedi.
AP jáne Reuters agenttikterine suhbat bergen amerikalyq sheneýnik ázirge kim jasaǵany belgisiz shabýyl barysynda tankerge qarsy dron qoldanylǵanyn aitqan.
