QR Oqý-aǵartý ministri Ashat Aimaǵambetov Qazaqstan mektepterindegi qaýipsizdik máselesin kóterdi, dep habarlaidy QazAqparat.
«Keshe Reseidiń Ijevsk qalasyndaǵy mektepte atys boldy. Ókinishke qarai, qaza tapqandar arasynda oqýshylar da bar. Biz úshin mundai oqiǵa sabaq bolýy kerek. Sondyqtan biz balalarymyzdyń qaýipsizdigi máselesin taǵy da kóteremiz», - dedi ol apparattyq keńeste.
Ministr bul baǵytta tiisti jumys júrgizilip jatqanyn, degenmen birqatar problema sheshilmegenin atap ótti.
Aimaǵambetov balalardyń qaýipsizdigin qamtamasyz etý úshin barlyq qajetti sharalardy qabyldap, jyl sońyna deiin kemshilikterdi joiýdy tapsyrdy.
Bilim jáne ǵylym ministrligi Balalardyń quqyqtaryn qorǵaý komitetiniń tóraǵasy Esenǵazy Imanǵalievtiń aitýynsha, oqý jylynyń basynda mektepter beinebaqylaý júiesimen 100% qamtamasyz etilgen. Alaida jedel basqarý ortalyǵyna tek 82% nemese 300 jáne odan kóp oqýshyǵa eseptelgen 2605 mektep qosylǵan.
Tómen kórsetkishter Aqtóbe, Almaty, Jambyl, Qaraǵandy oblystarynda baiqalady.
24 iri qalada 1351 orta bilim berý uiymy jumys isteidi, olardyń 83% kúzet agenttikterimen sharttar jasasqan.
Qostanai, Pavlodar, Atyraý, Soltústik Qazaqstan, Túrkistan oblystaryndaǵy kórsetkishter tómen.
Dabyl túimeleri 1117 mektepte nemese mektepterdiń 97%-ynda ornatylǵan. Eń tómen kórsetkishter Qyzylorda, Shyǵys Qazaqstan oblystarynda baiqaldy.
Ishki ister ministrligi júrgizgen tekserý nátijesinde 630-dan astam mektep terrorizmge qarsy qorǵalý talaptaryna sáikes keletini belgili boldy. Al 550-den astam mektepte buzýshylyqtar anyqtalǵan.
Aita keteiik, Reseidegi Ijevskide bolǵan atystan qaza tapqandar sany 15 adamǵa jetti. Olardyń arasynda 11 bala jáne 4 eresek adam bar. Onyń ishinde 24 adam zardap shekti.
