Japoniia 1993 jyldan bastap Qazaqstanǵa 1 mlrd. dollardan astam kredit, grant jáne tehnikalyq kómek kórsetti. Bul týraly búgin Japoniianyń Qazaqstandaǵy Tótenshe jáne ókiletti elshisi Itiro Kavabata málim etti, dep habarlaidy Ult.kz tilshisi QazAqparat agenttigine silteme jasap.
«1993 jyldan beri biz nesie, grant jáne tehnikalyq kómek túrinde járdem berip kelemiz. 2016 jyldyń sońynda Japoniianyń Qazaqstanǵa resmi kómeginiń jalpy kólemi 1 mlrd. 150 mln. dollardan asty. Onyń ishinde «Shóp tamyry» jobasy aiasynda kórsetilgen 5 mln. 769 myń dollar da bar», dedi ol Qazaqstanyń áleýmettik jobalaryna arnalǵan granttyq kelisimshartqa qol qoiý barysynda. Sonymen qatar elshi Japoniianyń aldaǵy ýaqytta da Qazaqstanǵa kómek kórsete beretindigin basa aitty.
«Árine, biz «Shóp tamyry» jobasy aiasynda kómek kórsetýimizdi jalǵastyra beremiz. Degenmen, Qazaqstannyń mártebesi jyldan jylǵa jaqsaryp keledi. Eger buryn Qazaqstan retsipient bolsa, qazir donorǵa ainaldy. Sizder ózderińiz qazir basqa elderge kómektesesizder. Sondyqtan bizdiń Qazaqstanǵa qatysty kómegimizdiń aiasy shektele túsedi. Qazir bizde «Shóp tamyry» baǵdarlamasy ǵana qalyp otyr», - dedi Kavabata.
Aita keteiik, búgin Qazaqstannyń 6 bilim jáne meditsina mekemesi Japoniia úkimetiniń «Shóp tamyry» baǵdarlamasy aiasynda 261942 myń dollar kóleminde qaitarymsyz kómek alýǵa granttyq kelisimshartqa otyrǵan bolatyn.
