Italiiada dúisenbi kúngi málimet boiynsha koronavirýstan qaitys bolǵandar sany 7 adamǵa jetti, dep habarlaidy dw.com saity.
Olardyń beseýi bir táýlikte kóz jumǵan. Eldiń soltústiginde COVID-19 virýsyn juqtyrdy dep 220 adamǵa diagnoz qoiyldy. Olardyń kópshiligi – Lombardiia men Venetoda.
Bilik soltústik Italiiadaǵy barlyq mektep, ýniversitet, murajai men kinoteatrlardy keminde bir aptaǵa japty, sondai-aq buqaralyq sharalarǵa, onyń ishinde tanymal Venetsiia karnavaly da toqtatyldy. Meiramhanalar jabyq, kóptegen kompaniialar qyzmetkerlerine úiden jumys isteýge ruqsat berdi. Jalpy alǵanda 50 myńnan astam adam turatyn 11 eldi meken virýstyń taralý qaýpine bailanysty karantinge jabyldy. Bilik osy sharalar bir apta ishinde infektsiianyń taralýyn toqtatý úshin jetkilikti bolady dep úmittenedi.
Italiiada kólemi boiynsha ekinshi qala, qarjy astanasy 1,3 million adam turatyn Milanda qalanyń bas gotikalyq shirkeýi jabyldy, «La Skala» opera teatrynda qoiylymdar toqtatyldy, A seriialy fýtbol chempionatynyń matchtary keiinge shegerildi.
Italiianyń týrist indýstriiasy aitarlyqtai shyǵynǵa ushyraidy. Sarapshylar eldiń ónerkásiptik aýdandarynda koronavirýstyń órshýine bailanysty Italiia ekonomikasyna retsessiia qaýip tóndirýi múmkin dep eskertti. Italiia qor naryǵy dúisenbi kúni shamamen 5%-ǵa tómendedi.
Eske sala ketsek, dúisenbi kúni Lombaridiia gýbernatory Attilio Fontana koronavirýstan besinshi qurban 84 jastaǵy qariianyń aýrýhanada kóz jumǵanyn rastady.
