يتالييادا دٷيسەنبٸ كٷنگٸ مەلٸمەت بويىنشا كوروناۆيرۋستان قايتىس بولعاندار سانى 7 ادامعا جەتتٸ, دەپ حابارلايدى dw.com سايتى.
ولاردىڭ بەسەۋٸ بٸر تەۋلٸكتە كٶز جۇمعان. ەلدٸڭ سولتٷستٸگٸندە COVID-19 ۆيرۋسىن جۇقتىردى دەپ 220 ادامعا دياگنوز قويىلدى. ولاردىڭ كٶپشٸلٸگٸ – لومباردييا مەن ۆەنەتودا.
بيلٸك سولتٷستٸك يتاليياداعى بارلىق مەكتەپ, ۋنيۆەرسيتەت, مۇراجاي مەن كينوتەاترلاردى كەمٸندە بٸر اپتاعا جاپتى, سونداي-اق بۇقارالىق شارالارعا, ونىڭ ٸشٸندە تانىمال ۆەنەتسييا كارناۆالى دا توقتاتىلدى. مەيرامحانالار جابىق, كٶپتەگەن كومپانييالار قىزمەتكەرلەرٸنە ٷيدەن جۇمىس ٸستەۋگە رۇقسات بەردٸ. جالپى العاندا 50 مىڭنان استام ادام تۇراتىن 11 ەلدٸ مەكەن ۆيرۋستىڭ تارالۋ قاۋپٸنە بايلانىستى كارانتينگە جابىلدى. بيلٸك وسى شارالار بٸر اپتا ٸشٸندە ينفەكتسييانىڭ تارالۋىن توقتاتۋ ٷشٸن جەتكٸلٸكتٸ بولادى دەپ ٷمٸتتەنەدٸ.
يتالييادا كٶلەمٸ بويىنشا ەكٸنشٸ قالا, قارجى استاناسى 1,3 ميلليون ادام تۇراتىن ميلاندا قالانىڭ باس گوتيكالىق شٸركەۋٸ جابىلدى, «لا سكالا» وپەرا تەاترىندا قويىلىمدار توقتاتىلدى, ا سەرييالى فۋتبول چەمپيوناتىنىڭ ماتچتارى كەيٸنگە شەگەرٸلدٸ.
يتالييانىڭ تۋريست يندۋستريياسى ايتارلىقتاي شىعىنعا ۇشىرايدى. ساراپشىلار ەلدٸڭ ٶنەركەسٸپتٸك اۋداندارىندا كوروناۆيرۋستىڭ ٶرشۋٸنە بايلانىستى يتالييا ەكونوميكاسىنا رەتسەسسييا قاۋٸپ تٶندٸرۋٸ مٷمكٸن دەپ ەسكەرتتٸ. يتالييا قور نارىعى دٷيسەنبٸ كٷنٸ شامامەن 5%-عا تٶمەندەدٸ.
ەسكە سالا كەتسەك, دٷيسەنبٸ كٷنٸ لومباريدييا گۋبەرناتورى اتتيليو فونتانا كوروناۆيرۋستان بەسٸنشٸ قۇربان 84 جاستاعى قارييانىڭ اۋرۋحانادا كٶز جۇمعانىن راستادى.
