Foto: © L'incidente / facebook.com/assem.zharbossynova
Nazarbaev Ýniversitetiniń qaýymy Italiiada kenetten qaza bolǵan Ásem Jarbosynnyń otbasy men týystaryna kóńil aitty, - dep habarlaidy Massaget.kz portaly.
"Nazarbaev Ýniversiteti qaýymdastyǵy 2023 jylǵy 17 qańtarda keshkisin Ásem Jarbosynnyń kenetten jáne kezdeisoq qaitys bolýyna bailanysty qaiǵysyna ortaqtasyp, kóńil aitady. Ol NU-dyń 2020 jylǵy Himiia jáne materialdar injeneriiasy magistratýra baǵdarlamasynyń túlegi. 2021 jyly ol Italiiadaǵy Salerno ýniversitetiniń doktorantýrasyna túsip, Eýropanyń taǵy bes bedeldi ýniversiteti men bes jetekshi ónerkásiptik kompaniia qatysatyn TUSAIL jobasynyń stipendiiasynyń iegeri boldy. Ol bul stipendiiaǵa NU magistratýrasynda oqyp júrgen kezindegi alǵashqy zertteýleriniń nátijeleri úshin ie boldy", - delingen habarlamada.
Áriptesteri, zertteýshiler Ásemdi ǵylymǵa qumar, álemge paidaly zat oilap tabýdy armandaǵan, aqkóńil, janashyr, órshil jas áiel retinde eske aldy.
"Ásem názik ári uialshaq, erekshe sulý, sonymen birge óte aqyldy jáne talantty qyz boldy, daryndy balalarǵa arnalǵan mektepte oqydy, dombyrada keremet oinady. Ár ata-ana osyndai balany armandaidy. Menimen birge Ásem Eýraziia ulttyq ýniversitetiniń bakalavriat stýdenti bolǵan kezinde, nikel kóbiginde grafendi sintezdeý boiynsha diplomdyq jumysyn aiaqtady, sátti qorǵalǵannan keiin Nazarbaev Ýniversitetiniń magistratýrasyna túsip, sátti aiaqtady. Ásem zertteý jumystarynda óte tiianaqty boldy, onyń zerthanalyq jazbalary kórkem týyndyǵa uqsaityn. Keiin men onyń jazbalaryn barlyǵyna úlgi etip qoidym. Bul bárimiz úshin óte úlken qaza jáne adam sengisi kelmeitin qaiǵy. Barsha týǵan-týysyna kóńil aityp, birge qaiǵyramyz, imandy bolsyn", – dedi National Laboratory Astana jetekshi ǵylymi qyzmetkeri Áliia Muqanova.
NU túlekteri qaýymdastyǵy Ásem Jarbosynnyń otbasyna qarjy jinaidy.
Eske salaiyq, búgin Italiiada qazaqstandyq stýdent qyz jol apatynan qaitys bolǵany habarlanǵan bolatyn. Oqiǵa 17 qańtarda bolǵan. Salerno ýniversitetiniń 27 jastaǵy doktoranty kósheden ótip bara jatqan. Sol kezde 20 jastaǵy júrgizýshi tizgindep bara jatqan Peugeot 308 júrgizýshisi ony jaiaý júrginshiler jolynda qaǵyp ketken. Jol apaty Stanislao Lista kóshesinde, Djýzeppe Verdi opera teatrynyń mańynda bolǵan.
Qazaqstannyń syrtqy ister ministrligi 27 jastaǵy stýdenttiń jol apatynan qaza tapqanyn rastady. Búginde ministrlik stýdenttiń denesin Qazaqstanǵa jetkizý jumystarymen ainalysyp jatyr.
