Italiiada sońǵy táýlikte koronavirýs infektsiiasynan kóz jumǵandar sany kúrt ósti, indet 793 adamnyń ómirin qidy.
Bul elde qaýipti virýstan mert bolǵandar sany 4 825 adamǵa jetip otyr, dep habarlaidy Bi-Bi-Si agenttigi.
Dúniejúzilik densaýlyq saqtaý uiymynyń málimetine súiensek, álem boiynsha bir táýlikte koronavirýs infektsiiasyn juqtyrǵandardyń sany 32 myń adamǵa kóbeiip, 266 myńǵa jetip qoiǵan. 11 myńǵa tarta kisi qaitys bolǵan.
Djons Hopkins ýniversitetiniń habarlaýynsha, tipti álemde koronavirýsty juqtyrǵandardyń sany 300 myńnan asyp ketken.
Italiia beisenbi kúni-aq koronavirýstan bolǵan ólim-jitim boiynsha Qytaidyń aldyna shyǵyp ketken edi. 22 naýryzdaǵy málimetke súiensek Covid-19 Italiiadaǵy 53 578 turǵynnan tabylǵan. Bul 21 naýryzdaǵy kórsetkishten 6 557-ge artyp otyr.
Koronavirýstyń eń úlken oshaǵy anyqtalǵan Lombardiiada infektsiianyń taralýyna jol bermeý maqsatynda qatań sharalar qolǵa alyndy. Senbi kúni keshke jariialanǵan jańa erejelerge sáikes kóshede sportpen, dene mashyǵymen ainalysýǵa tyiym salynǵan. Saýda avtomattaryn paidalanýǵa da shekteý qoiylǵan.
Halyqqa eń qajetti taýarlardy sanamaǵanda bizneske barlyq operatsiiany toqtatýǵa pármen berildi. Aýrýhana turǵyzýdan basqa barlyq qurylys jumysyn júrgizýge tyiym salyndy. Ashyq aspan astyndaǵy barlyq bazardyń jumysy toqtatyldy.
Lombardiiada koronavirýs infektsiiasyn juqtyrǵannan 3 095 adam jan tapsyrǵan.
Rimdegi eki monastyr karantinge jabyldy. Ondaǵy 59 monah áiel koronavirýs juqtyryp alǵan. Elde Covid-19 indetinen 28 din qyzmetkeri baqilyq boldy.
Resei senbi kúni koronavirýspen kúresý úshin Italiiaǵa áskeri virýsologtar men qajetti qural-jabdyqtardy jiberetinin jariia etti.
