Italiianyń Premer-ministri Djýzeppe Konte seisenbi kúni keshqurym otstavkaǵa ketetini jóninde málim etti. Ol mundai málimdemeni koalitsiialyq úkimetke senimsizdik bildirý týraly «Liga» bileýshi partiiasynyń ótinimhat joldaý sheshiminen keiin jasady, dep habarlaidy Reuters.
Djýzeppe Konte Liganyń arańdatýynan týyndaǵan saiasi tártipsizdik máseleleri boiynsha parlament múshelerine qarata sóilegen sózinde Prezident Serdjo Mattarellaǵa otstavkaǵa ketý týraly ótinish túsiretinin jetkizdi.
Óz kezeginde Italiia basshysy merziminen buryn sailaý ótkizýdiń qajettiligin nemese jańa bileýshi koalitsiiany qurý týraly sheshýi tiistigi atap ótiledi.
Italiianyń Premer-ministri qalyptasqan jaǵdaiǵa Ishki ister ministri Matteo Salvinidi aiyptady. «Salvini óz múddelerin jáne óz partiiasynyń múddelerin kózdeitinin kórsetti. Onyń sheshimderi el úshin aýqymdy qaýip týdyryp otyr», - dedi ol.
Djýzeppe Konte 12 kún buryn koalitsiiany «dármensiz» dep atap, merziminen tys sailaý ótkizý qajettigi týraly aitqan IIM basshysynyń is-áreketterin aqylǵa qonymsyz dep málimdedi. «Bul eldi saiasi turaqsyzdyqtyń shyrmaýyna jáne qarjylyq turaqsyzdyqqa alyp kelýi múmkin», - dedi ol.
