Koronavirýs juqtyrǵandar men virýstan qaza bolǵandar sany jaǵynan álemde birinshi orynda turǵan Italiiada bilik epidemiiamen kúres sharalaryn kúsheitti.
Italiia úkimetiniń jetekshisi Djýzeppe Konte senbi kúni keshke eń mańyzdy mekeme men uiymdardan basqa barlyq kásiporyn, nysandardy jabý týraly sheshim qabyldady. Dúken, dárihana, bank, poshtadan bólek, qoǵamdyq kólikter, hat-habar jetkizý qyzmeti, eń qajetti azyq-túlik ónimderin shyǵaratyn kásiporyndar jumys istei beredi. Premer-ministr epidemiiaǵa bailanysty Italiia "óndiris motoryn" báseńdetedi, biraq tolyq toqtatpaidy. Konte "ekonomikalyq tótenshe jaǵdai" týraly aitty.
Buǵan deiin engizilgen jalpyulttyq karantin erejeleri qataiady, barlyq parkter jabylady, adamdardyń úiden shyǵýyna tyiym salynǵan.
Italiiada sońǵy táýlikte koronavirýstan 793 adam qaitys bolǵan. Bul aldyńǵy kúnmen salystyrǵanda shamamen 20 paiyzǵa kóp. Epidemiia bastalǵannan beri 4825 adam kóz jumǵan. Virýsty juqtyrǵandar sany 53,5 myńnan asty. Birneshe kún buryn Italiiada virýstan qaza bolǵandar sany Qytaidan asty. Bir táýlikte 6557 adamǵa virýs juqqan.
