QR Syrtqy ister ministrliginiń burynǵy sheneýnikterine taǵylǵan «Qyzmettik ókilettigin teris paidalandy» degen aiyp rastalmady, dep habarlaidy QazAqparat tilshisi Nur-Sultan qalasy sotyna silteme jasap.
Nur-Sultan qalasy sotynyń qylmystyq ister jónindegi sot alqasy QR Syrtqy ister ministrliginiń burynǵy jaýapty hatshysy Anarbek Qarashev, Qazaqstannyń Ózbekstandaǵy burynǵy elshisi Erik Ótembaev jáne «Diplomatiialyq qalashyq qurylysy direktsiiasy» JShS direktory B. Nurekenovke qatysty qylmystyq isti qarady.
«Eske sala keteiik, budan buryn Nur-Sultan qalasy «Baiqońyr» aýdanynyń №2 sotynyń 2020 jylǵy 18 qyrkúiektegi úkimimen A.Qarashev (QR SIM-niń burynǵy jaýapty hatshysy) laýazymdyq ókilettigin asyra paidalanǵany, al E.Ótembaev (QR Ózbekstandaǵy burynǵy elshisi) jáne B.Nurekenov (merdigerlik uiymnyń direktory) - atalǵan is-áreketterge járdemdeskeni úshin kináli dep tanylǵan bolatyn», - delingen habarlamada.
Apelliatsiialyq alqa atalǵan iske qatysty «Qyzmettik ókilettikti teris paidalaný» aiyby boiynsha zalal joq degen qorytyndyǵa keldi.
«A.Qarashevtiń laýazymdyq ókilettikterin teris paidalanýy jáne oǵan E.Ótembaev pen B.Nurekenovtyń járdemdesý is-áreketi men sebep-saldary dáleldenbegen. Al dálel qylmys quramynyń mindetti bóligi», - dep habarlaidy qalalyq sottan.
Laýazymdyq ókilettigin teris paidalaný boiynsha tulǵany kináli dep taný úshin kelesi jaǵdailardy anyqtaý qajet:
- jeke basyna, basqa adamdarǵa nemese uiymdarǵa qatysty qyzmettik ókilettigin paidalaný maqsatynyń bolýy;
- qyzmettik ókilettigin paidalaný kezinde basqa adamdarǵa nemese uiymdarǵa ziian keltirý.
«Sot tergeýi barysynda apelliatsiialyq satyda A.Qarashevtiń qyzmet babyn teris paidalanǵany jáne E.Ótembaev pen B.Nurekenov tarapynan járdem berilgeni rastalmady. Isti qaraý nátijesi boiynsha qylmystyq ister jónindegi sot alqasymen aqtaý úkimi shyǵaryldy», - dep jazylǵan sottyń aqparatynda.
Eske sala ketsek, 2020 jyly 2 qazanda QR Syrtqy ister ministrliginiń burynǵy jaýapty hatshysy Anarbek Qarashev pen Qazaqstannyń Ózbekstandaǵy burynǵy elshisi Erik Ótembaevqa qatysty Nur-Sultan qalasy «Baiqońyr» aýdany № 2 soty aiyptaý úkimin shyǵarǵan edi.
