Foto: Olympik.kz
Qazaqstan quramasy Úndistannyń astanasy Niý-Delide ótip jatqan nysana kózdeýden Aziia chempionatynyń kezekti kúninde qorjynyn 3 altyn jáne 2 kúmis medalmen tolyqtyrdy, dep habarlaidy Ult.kz.
50 metr qashyqtyqtan kishi kalibrli vintovkamen jatyp nysana kózdeý saiysynda Parij Olimpiadasynyń qola júldegeri Islam Sátpaev jeńiske jetti. Sol synnyń ózinde Nikita Shahtorin kúmis medaldi jeńip aldy.
Komandalyq básekede Islam Sátpaev, Nikita Shahtorin jáne Konstantin Malinovskii úzdik nátije kórsetip, altyn júldege qol jetkizdi.
25 metrden jyldam atylatyn tapansha jarysynda Nikita Chiriýkin, Artemii Kabakov jáne Kirill Tsýkanov komandasy qarsylastarynan ozyp shyǵyp, altyn medaldi ielendi. Al jekelei synda Nikita Chiriýkin kúmis júldeger atandy.
Aita keteiik, chempionat eresekter, jastar jáne jasóspirimder sanattarynda ótýde. Biylǵy dodaǵa qurlyqtyń 20 elinen 320-dan astam sportshy qatysyp jatyr. Qazaqstan quramasy úsh jas sanatynda 47 mergenmen jarysqa tústi.
