Ózbekstan prezidenti Islam Kárimovtiń qyzy Lola Kárimova-Tilliaeva Ózbekstan halqyn Táýelsizdik kúnimen quttyqtady, - dep habarlaidy kaz.tengrinews.kz tilshisi onyń Instagram jelisindegi paraqshasyna silteme jasap.
"Otandastarymdy shyn júregimmen Táýelsizdik kúnimen quttyqtaimyn! Bizdiń eńbekqor ári sheksiz daryndy, qaiyrymdy Ózbekstan halqyna baqyt, gúldený men órkendeý tileimin! Berekeli jerimizde túrli ulttar men túrli din ókilderiniń arasynda beibitshilik pen tynyshtyq, toleranttylyq jáne ózara qurmet bolsyn!", - dep jazdy prezidenttiń kenje qyzy.
Sonymen qatar, ol Prezidentke aityp jatqan jyly sózderi men aq tilekteri úshin halqyna alǵysyn bildirdi. "Bul biz úshin óte mańyzdy, júrekterińizdiń tórinen shyǵyp jatqan jaqsylyqtaryńyzdyń kúshi onyń aiyǵyp ketýine kómektesip jatqanyna senimdimin! Kóp raqmet!", - dep jazdy ol.
Aita keteiik, osyǵan deiin Ózbekstanda el táýelsizdiginiń 25 jyldyǵyna orai 31 tamyzǵa belgilengen saltanatty sharalar keiinge qaldyrylǵany habarlanǵan bolatyn. Al onyń aldynda Ózbekstan prezidentiniń qaitys bolǵany týraly qaýesetter taraǵan edi. Alaida bul málimet resmi túrde naqtylanbady.
