Foto:facebook
QR Kókpar federatsiiasynyń qurmetti prezidenti, Parlament májilisiniń depýtaty Aidarbek Qojanazarov V Dúniejúzilik kóshpendiler oiyndarynda kókpardan finaldyq kezdesýde qazaq-qyrǵyz kókparshylary arasynda bolǵan daýǵa qatysty pikir bildirdi, dep habarlaidy "Ult Aqparat".
"Ár sport túrinde ereje ár túrli buzylady"
"Kókpar federatsiiasynyń qurmetti prezidenti retinde, birneshe jyldan beri kókpardyń damýyna úles qosyp júrgen azamat retinde, keshe ótken finaldyń kýágeri retinde qazaq-qyrǵyz arasyndaǵy aqtyq oiynǵa qatysty pikir bildirgen durys dep sheshtim.Kókpar — naǵyz batyr jigitterdiń arasyndaǵy báseke. Keide attyń ústindegi adamnyń emotsiiasy dop qýǵan ne boz kilemde alysyp-julysqan sportshydan basym túsip jatady. Ár sport túrinde ereje ártúrli buzylady. Kókparda qamshysyn siltep jiberse, asa bir aryzdanatyn jaǵdai emes. Jappai kókparda odan da qorqynyshty kadrlardy kórip júrmiz. Ras, búgin oiynda tártip buzyldy, tóreshiler keńese kele tártip buzǵan oiynshyǵa eskertý berdi. 2 minýtqa shetke shyǵardy. «Bas jarylsa - bórik ishinde, qol synsa - jeń ishinde» degendei, alańdaǵy ala shań sol jerde qalýy kerek. Bul áýelden kókpardyń jazylmaǵan erejesi.Ekinshiden, tóreshiniń aitqany zań! Meili qandai sport túrin alsaq ta, sportshy onymen salǵylaspaidy. Shamdanýy múmkin, kelispei suraý salýy múmkin, biraq týlap, ádepten attamaidy. Ádemi oiyn kórseteiik degen jerde, tóreshini tyńdaý paryz. Álemdik deńgeidegi kez kelgen sportta tóreshige baǵynbaý, qurmetsizdik kórsetý degen atymen joq", - dedi Aidarbek Qojanazarov .
Kókpar federatsiiasynyń qurmetti prezidentiniń pikirinshe, Qazaqstan quramasynyń jeńisine daý bolmaýy kerek.
"Úshinshiden saǵan qurmet kórsetken jerde oǵan jaýap retinde iltipat bildirse qandai jarasymdy. Ishtegi otyń kúidirip sónbei jatsa, moinyńdaǵy medaldi alyp tastai ber. Túrińdi tyrjityp, teris qarap tursań da qabyldanady. Biraq qonaq qylyp shaqyryp jaǵdaiyńdy jasaǵan, aǵaiyn dep ardaqtaǵan, júldesin qolyńa ustatyp arqańnan qaqqan memlekettiń ánurany oinaǵanda bir sátke sabyr etip, eldik múddeni joǵary qoiý - ár sportshyǵa qajet qasiettiń biri.
Sóz joq, qyrǵyz kókparshylary táýir daiyndalǵan. Attaryn sheber baptaǵan. Biraq qazaqtyń kókparshylary anyq basym tústi. Qyrǵyzdar oiyn alańynda 10 salym salamyz dese, bireý oǵan kedergi jasady ma?! Kerek dese eki jaq teń túsip, qosymsha ýaqyt ta berildi. Qosymsha ýaqyt berilmei, «Qazaqstan basym tústi» dese, ortaǵa qamshyny eń birinshi myna men tastar edim. Qudaishylyǵyn aitaiyq, Qazaqstannyń Ulttyq quramasy taza jeńdi! Alysty, julysty, biraq utty! Jalpy dala erleri úshin jeńilgenin moiyndaý da erlik! Basqa artyq sóz joq!" – dedi ol.
"Áli talai kókpar tartamyz"
Aidarbek Qojanazarovtyń pikirinshe eki memlekettiń tatýlyǵy men dostyǵy - kez kelgen oiynnyń nátijesinen qadirli bolýy kerek.
"Búgin qazaq jeńse, erteń qyrǵyz utady. Ymyra men yntymaqty oilasaq, áli talai kókpar tartamyz. Qaita qazaq-qyrǵyz sekildi myqty qarsylas shyqpasa, kókparda sán bolar ma edi? Osynshama jankúier jinalyp, qiqýlap tik turyp tamashalar ma edi?! Ashyǵyn aitqanda bizden basqa kimge kerek bul oiyn?! Serkeni ilemiz dep júrip syiymyzdy ketirip almaiyq. Qandai ǵasyr, qandai zaman kelse de, qazaq pen qyrǵyzǵa tek baýyrmaldyq jarassa kerek! – dedi Májilis depýtaty.
Aita keteiik, keshe V Dúniejúzilik kóshpendiler oiyndarynda Qazaqstan men Qyrǵyzstan quramalary arasynda daý shyqqan bolatyn. Qyrǵyz kókparshylary men jankúierlerin qyrǵyzstandyq kókparshyǵa Qazaqstan quramasynyń ókili qamshy siltep qalǵany men oǵan tártip buzǵany úshin eshqandai shara qoldanylmaǵany shamdandyrdy.
Odan bólek "jýrnalisterdi (onyń ishinde qyrǵyz tilshileri de bar) túsirilim alańynan shyǵarylmaq boldy" degen narazylyq týdy.
Dúniejúzilik kóshpendiler oiyndarynda kúmis medal alǵan qyrǵyz kókparshylarynyń jetekshisi Erlan Ábdiǵapparov jarys ádiletsiz boldy dep málimdedi.
