QR Indýstriia jáne infraqurylymdyq damý ministrliginiń keńeitilgen alqa májilisinde QR Premer-Ministriniń orynbasary Roman Skliar birqatar tapsyrma berdi, dep habarlaidy QazAqparat.
«Kólik salasyn damytý boiynsha búgin aitylǵan «Nurly jol» infraqurylymdy damytý memlekettik baǵdarlamasynyń 2020-2025 jyldarǵa arnalǵan, sonyń ishinde 2020 jyly oryndalýy kerek josparyn erekshe baqylaýǵa alý qajet. Konteiner tasymaly kólemin kem degende 30%-ǵa arttyrý kerek, sonymen qatar Quryq porty men Iran porttary arasynda parom qyzmetin ashý úshin shara qabyldaý kerek. Budan bólek, sizderge elimizdiń ishki sý joldarynda keme qatynasyn damytý tujyrymdamasyn ázirleýdi tapsyramyn», - dedi Roman Skliar.
Sonymen qatar, onyń aitýynsha, aavtokólik mekemesi jergilikti atqarýshy organdarmen birlesip, múmkindiginshe jeke tasymaldaýshylardy tarta otyryp, aimaqtardaǵy áleýmettik mańyzy bar baǵyttardy sýbsidiialaýdy uiymdastyrýy tiis.
«Qurylys maýsymy bastalǵanǵa deiin maqsatqa jetý úshin joldy damytý kezinde jyldyq suranystaǵy inertti materialdardyń kem degende 70% satyp alý qajet. Jol salý, jóndeý jáne kútip ustaýdy júieli negizde qamtamasyz etý kerek. Aqtóbe - Atyraý - Astrahan, Qaraǵandy - Balqash - Almaty, Taldyqorǵan - Óskemen jáne basqa da kólik joldarynda qozǵalys ashýdy pysyqtaý kerek», - deidi ol.
Sondai-aq, Roman Skliar ministrlikke ákimdiktermen birge sý tasqyny kezeńine sapaly daiyndyqty erekshe baqylaýǵa alýdy, sondai-aq jergilikti jol jelilerin qalpyna keltirýge qarjy bólýdi tapsyrdy.
