OKQ-da ótken baspasóz máslihatynda Ishki ister vitse-ministri Aleksei Kalaichidi elordadaǵy otshashýǵa qatysty pikir bildirdi, – dep habarlaidy "Ult aqparat".
«Eger biz bas memlekettik sanitarlyq dárigerdiń qaýlysyn oryndamasaq, onda Ákimshilik quqyqbuzýshylyq jónindegi kodeks boiynsha bas dárigerdiń qaýlysyn buzǵany úshin jaýapkershilik bar. Ereje buzýshylyq boiynsha jeke jáne zańdy tulǵalardyń jaýapkershiligi qarastyrylǵan basty qujat – bas dárigerdiń qaýlysy. Qaýlyda otshashý uiymdastyrýǵa tikelei tyiym joq», - dedi Aleksei Kalaichidi.
Ol sonymen qatar otshashýdy tamashalaýǵa shekteýdiń de joqtyǵyn, ony tamashalaý barysynda birde-bir adam jazalanbaǵanyn málim etti. Buǵan deiin Aleksei Kalaichidi elimizde dári-dármekti zańsyz satýǵa qatysty 17 jaǵdai boiynsha sotqa deiingi tergeý amaldary júrgizilip jatqanyn habarlaǵan edi.
«Dári-dármekti qymbatqa satatyndar Ákimshilik quqyqbuzýshylyq jónindegi kodekstiń 426-baby boiynsha jaýapqa tartylady. Bul bap boiynsha jeke adamdarǵa 70 AEK, al iri kásipkerlik nysandarǵa 1 000 AEK aiyppul salynady», - dedi sondai-aq Aleksei Kalaichidi OKQ-da ótken baspasóz máslihatynda.
