Ishki ister organdaryndaǵy qyzmettiń qyzyǵy men shyjyǵyna shydap, aianbai eńbek etip jatqan jastar az emes. Sonyń biri - Almaty qalasy mamandandyrylǵan kúzet qyzmeti basqarmasynyń politsiia qyzmetkeri Berik Ómirzaqov. Ol - qarýlanǵan qaraqshylardy izin sýytpai ustaǵan politsei, dep habarlaidy QazAqparat.
Berik Ómirzaqovtyń quqyq qorǵaý salasynda jumys istegenine 5 jyl. Osy ýaqyt aralyǵynda ol óziniń kásibi maman ekenin kórsete bildi.
«Men bul salaǵa 2016 jyly keldim. Bul - meniń bala kezdegi armanym bolatyn. Osy mamandyq iesi bolý úshin biraz ter tóktim. Sportpen shuǵyldandym, kóp oqydym. Mektepte júrgende ishki ister organy qyzmetkerleri týraly film kórgendi jaqsy kóretinmin. Bul mamandyq adamdy adal, jaýapty, janashyr, patriot bolýǵa tárbieleidi», - deidi ol.
Berik Ómirzaqov búgingi kúni Almatydaǵy strategiialyq nysandardyń biri- jylý elektr stansasynyń kúzetinde jumys isteidi.
«Men mańyzdy nysandy kúzetemin. Maǵan artylǵan jaýapkershilik zor. Sonydyqtan ózime senip tapsyrylǵan mekemeni qorǵaý basty mindetim dep sanaimyn», - deidi aǵa serjant.
Berik Ómirzaqov biylǵy 24 aqpanda qaraqshylyq jasaǵan qylmyskerdi izin sýytpai ustap, politsiiaǵa tapsyrdy.
Naýryzbai aýdanynda kúndiz qylmyskerler úige zańsyz kirip, sol jerden birneshe qundy zatty urlap, qashyp ketpek bolǵan.
«Osy kezde men jumystan kele jatqan edim. Bir kezde jábirlenýshiniń úiinen shyǵyp bara jatqan kúdiktilerdi baiqap qaldym. Birden jeke úidiń ashyq turǵan esiginen kirdim. Bir áiel kómek surady. Ol ózderin tonap ketkenin aitty. Oilanbastan kúdiktilerdiń izine tústim. Birneshe minýt ishinde qaraqshylar ketip bara jatqan kóliktin jolyn bógep, qasha jónelgen qylmyskerlerdiń birin ustap úlgerdim. Keiin belgili bolǵandai, K. esimdi azamat buryn-sońdy osyndai qylmysy úshin sotty bolǵan. Kúdiktiler jatyn bólmedegi seifti ashyp, sol jerden 9 mm kalibrli gaz tapanshasyn urlap ketken eken», - deidi ol.
Berik Ómirzaqov óziniń bul árketin erlik dep sanamaidy.
«Iá, men qylmyskerlerdi ustaýǵa kómektestim. Biraq ony erlik dep sanamaimyn. Bul - meniń azamattyq boryshym jáne mindetim», -deidi Berik Ómirzaqov.
