Elimizde qylmys jii tirkeletin aimaqtar belgili boldy, dep habarlaidy QazAqparat tilshisi.
«Ishki ister ministrligi elimizde ahýaldy turaqtandyrý, qoǵamdyq tártipti jáne qaýipsizdikti qalpyna keltirý boiynsha birqatar shara qabyldan jatyr. Jeke quram erekshe rejim jaǵdaiynda qoǵamdyq tártipti saqtaýdy jalǵastyrýda. Barlyq eldi mekenderde patrýldeý jasaqtary kúsheitilgen. Eldiń barlyq aimaqtarynda «Quqyqtyq tártip» jedel-profilaktikalyq sharasy ótip jatyr. Maqsaty – jedel ahýaldy saýyqtyrý, zańdylyq pen quqyqtyq tártipti qamtamasyz etý, sondai-aq tótenshe jaǵdai saldaryn joiý», - dedi QR IIM ákimshilik politsiia komiteti basqarma basshysynyń orynbasary Dáýren Qozybaqov onlain ótken brifingte.
Ministrliktiń málimetine sáikes, «Quqyqtyq tártip» jedel-profilaktikalyq sharasy barysynda 13 myńnan astam qylmys tirkelgen.
«Onyń ishinde 1 myńnan astam qylmys qoǵamdyq oryndarda jáne 260-y kóshede boldy. Qylmys jii jasalatyn óńirlerge kelsek ShQO (1 454), Almaty (1 315), Almaty oblysy (1 227), Qaraǵandy (1 118), Shymkent (1 108) jáne SQO (1005). Sondai-aq, 8 myńnan astam qylmys izin sýytpai ashyldy. Mysaly, Jambyl oblysynyń Shý qalasynda 1995 jyly týǵan azamat ustaldy, ol túnde «Miata» dámhanasynda 3 azamatty óltirmekshi bolǵan (1995, 1991 jáne 1983). Zardap shekken azamattar aýrýhanaǵa jatqyzyldy», - deidi ol.
