Memleket basshysy Ishki ister ministri Marat Ahmetjanovty qabyldady, - dep habarlaidy "Ult aqparat" Aqordaǵa silteme jasap.
Prezidentke elimizdegi kriminogen jaǵdaidyń jai-kúii týraly esep berildi. Qasym-Jomart Toqaevqa qaraqshylyq, mal urlyǵy, alaiaqtyq, onyń ishinde internet alaiaqtyǵy, sondai-aq, buryn sottalǵandardyń mas kúiinde, otbasylyq-turmystyq salada jáne toptasyp jasaǵan qylmystarynyń sany aitarlyqtai tómendegeni týraly baiandaldy.
Ministr Memleket basshysyna uiymdasqan qylmys pen esirtki biznesine qarsy is-qimyl jóninde qabyldanyp jatqan sharalar týraly málimet berdi.
Prezident kámeletke tolmaǵandarǵa qatysty jáne otbasylyq-turmystyq saladaǵy qylmystyń aldyn alý jumystarynyń nátijelerimen tanysty.
Marat Ahmetjanov Qasym-Jomart Toqaevqa ishki ister organdarynyń qyzmetin biýrokratiiadan aryltý, jumys úderisterin tsifrlandyrý jáne avtomattandyrý, ishki rásimderdi, sonyń ishinde memlekettik qyzmet kórsetý salasyn ońtailandyrý jóninde baiandady.
Memleket basshysyna kriminogen jaǵdaiǵa monitoring jasaityn IIM Ahýaldyq taldaý ortalyǵynyń múmkindikterin keńeitý týraly aqparat berildi.
Sonymen qatar, Prezidentke jol qozǵalysy erejelerin qasaqana buzatyndardy anyqtaýǵa baǵyttalǵan jańa júie jumysynyń aldyn ala nátijeleri týraly aityldy.
Kezdesý sońynda Memleket basshysy ministrge elimizdegi quqyqtyq tártip pen qoǵamdyq qaýipsizdik deńgeiin odan ári arttyrý jóninde birqatar tapsyrma berdi. Osy rette internet alaiaqtyǵy men qarjy piramidalaryna qarsy is-qimyl jónindegi sharalardy jandandyrý qajet ekeni atap ótildi.
