Foto: Polisia.kz
Taldyqorǵanda bolǵan rezonanstyq oqiǵaǵa bailanysty Ishki ister ministri Erjan Sadenov IIM ortalyq apparaty qyzmet basshylarynan quralǵan arnaiy toppen Jetisý oblysyna bardy, – dep habarlaidy Polisia.kz.
Vedomstvo basshysy óziniń sapary aiasynda óńir politsiiasynyń jeke quramymen jáne IIO ardagerlerimen kezdesý ótkizdi. Otyrysqa oblys ákimi Beibit Isabaev ta qatysty.
"El azamattarynyń konstitýtsiialyq quqyqtaryn qorǵaityn politsiia qyzmetkeri úshin zań men tártip birinshi orynda bolýy kerek. Quqyqqa qaishy kelgen azamattar men politseilerdiń zańsyz áreketine tosqaýyl qoiylýy tiis. Zań bárine ortaq", – dep atap ótti Erjan Sadenov.
Kezdesýde IIM basshysy Jetisý oblysynyń politsiia basshylaryna qatysty qabyldanǵan sheshimdi aitty.
Osylaisha, oblystyq politsiia departamentiniń bastyǵy Atyǵai Arystanov qyzmetinen bosatyldy. Al onyń birinshi orynbasary Jasulan Baikenovke qyzmettik sáikestiktiń tolyq emestigi týraly eskertildi.
Sondai-aq oblystyq departament bastyǵynyń kadr saiasaty jónindegi orynbasary Talant Jumabek pen tergeý boiynsha orynbasary Maqsat Erejepov te óz qyzmetterinen bosatyldy.
Jetisý oblysy PD bastyǵynyń mindetin endi politsiia general-maior Arman Sadanov atqaratyn bolady. Buǵan deiin ol IIM ózindik qaýipsizdik departamentin basqarǵan.
