Foto: Akorda.kz
Memleket basshysy Ishki ister ministri Marat Ahmetjanovty qabyldady, dep habarlaidy "Ult aqparat" Aqordanyń resmi saityna silteme jasap.
Prezidentke vedomstvonyń byltyr atqarǵan jumysy men aldaǵy kezeńge arnalǵan jospary jóninde esep berildi.
Memleket basshysyna quqyqbuzýshylyqtardyń aldyn alý úshin qabyldanyp jatqan sharalar týraly baiandaldy. Bul sharalar elimizde kisi óltirý qylmystarynyń sanyn aitarlyqtai azaitýǵa yqpal etti. Sondai-aq urlyqqa jáne mal urlyǵyna qatysty qylmystardy ashý jumystary kúsheitildi.
Marat Ahmetjanovtyń aitýynsha, uiymdasqan qylmystyń shyǵý sebepteri men qarjylandyrý kózderin joiýǵa basymdyq bere otyryp, olarǵa qarsy kúres tásilderin ózgertý nátijesinde uiymdasqan qylmystyq toptardyń (UQT) 24 basshysy men 114 múshesi tutqyndaldy.
Prezidentke kiberqylmyspen kúresý úshin qabyldanyp jatqan sharalar týraly da baiandaldy. Internet-alaiaqtyqqa qarsy is-áreket jónindegi keshendi sharalardy júzege asyrý barysynda uialy bailanys kompaniialary «aýyspaly» nómirlerden shalynǵan 5,5 million qońyraýdy buǵattaǵan. Ministrlik alty uiymdasqan qylmystyq topty joiyp, alaiaqtyq belgileri bar 165 saittyń jumysyn toqtatty.
Sonymen qatar Ishki ister ministrligi basqa quqyq qorǵaý jáne arnaýly organdarmen birlesip, 2781 esirtki qylmysyn anyqtady. Zańsyz ainalymnan 15 tonnadan astam esirtki tárkilenip, 70 esirtki zerthanasy joiyldy jáne esirtki jarnamalaityn 1990 sait buǵattaldy.
Kezdesý sońynda Memleket basshysy turmystyq zorlyq-zombylyqtyń, internet-alaiaqtyqtyń, aýyldyq jerlerdegi qylmystyń kez kelgen kórinisi boiynsha aldyn alý sharalaryn qabyldaýdyń jáne jedel áreket etýdiń mańyzdy ekenin atap ótti. Prezident bul baǵytta uiymdastyrý jumystaryn júrgizip, zańnamalyq sharalar qabyldaýdy tapsyrdy. Sondai-aq vedomstvo basshysyna elimizde jol qaýipsizdigi men quqyqtyq tártipti qamtamasyz etý jóninde birqatar mindet júktedi.
