Balanyń anasy usynǵan sýret
Uzynaǵashta dárigerler 2 jasar Arsende appenditsit ekenin 5 kún boiy anyqtai almaǵan. Saldarynan qazir balanyń jaǵdaiy nashar. Bul týraly kishkentai Arsenniń anasy Malika Saǵyndyq aityp berdi, - dep habarlaidy Massaget.kz portaly.
Onyń sózinshe, úide balanyń dene qyzýy 40 gradýsqa deiin kóterilip, ishi ótip, qusqan.
"Sodan men aýyldaǵy dárigerlerge bardym. Olar birden ózderiniń terapevtterine jiberdi. Olar dimedrol men analgin berdi. Terapevt qazir virýs júrip jatqanyn aitty, emdeisiz, eki kúndei qaralyp, meniń baqylaýymda bolasyz dedi. Jazyp bergen dárileriniń bárin aldym. Jaqsy dep úige kettim. Úide bala qatty mazasyzdana bastady. Ishi búrilip qaldy. Búktelip qalady da, qaitadan turady. Sosyn qorqyp aýyldaǵy dárigerdi shaqyrdym, ol kisi "qazir aita almaimyn, Uzynaǵashqa baryp, hirýrgke kórset, ol mindetti túrde rentgenge túsirtedi" dedi.
Uzynaǵashqa sol kúni dereý jettik. Balanyń dene qyzýy kóterilip tur, qusyp jatyr. Hirýrgke jaǵdaidy túsindirdim, ol balanyń ishin basyp kórip, bul infektsiia dedi. "Pediatr kórsin, balanyń aýzy keýip ketipti" dedi", - deidi Malika.
Osylaisha pediatr da, hirýrg te balasy men anasyn infektsiialyq aýrýhanaǵa jatqyzǵan.
"Bizdi dáriger qabyldady, ol kisi de balanyń ishin ustap, basynda túsinbedi. Artynan dáriler salyp, analizder aldy. Ertesine balam taǵy búktelip qaldy. Birinshi kúni kelgen kezimde de dárigerlerge "appenditsit emes pe, tekserińizshi" dep edim, "joq!" dedi. Infektsiialyq aýrýhanadaǵylarǵa da "appenditsit-aý" dep edim "bala appenditsitte bulai jatpaidy, dene qyzýy kóterilmeidi, quspaidy" dedi. Bes kún dári saldy, klizma jasady, dárigerler kelip balanyń ishin basa beredi. Rentgenge jatqyzyp emes, turǵyzyp túsiredi eken, olar jatqyzyp túsirgendikten taza shyqqan. Al turǵyzyp túsirgen kezde ishekteri úlkeiip ketken, oratylyp qalǵany kóringen. Rentgen men ÝDZ sáikes bolsa operatsiia jasaimyz dedi. Sol sózdi estip jaman bolyp qaldym. Artynan úlken kisilerge qaraityn hirýrg keldi, sol kisini jibermegende balam óledi eken ǵoi sol jerde", - deidi Malika Saǵyndyq.
Oqiǵa Uzynaǵashtaǵy aýdandyq infektsiialyq aýrýhanada bolǵan eken.
"Kelip qaraǵan da joq, tek dári salyp ketedi. Balanyń dene qyzýy túnimen kóterildi. Dárilerdiń kúshimen ǵana júrdi. "Ishim, ishim" dep jatady. Endi operatsiia jasaldy, ishiniń bári irińdep ketken, saý jeri joq, ishekterin alyp tazalaǵan, hirýrg qolynan kelgenin jasaǵan. Appenditsit bolǵan jeri shirip ketken ǵoi. Klizma jasap, ishin basqan saiyn bári kóterilip ketken. Hirýrg birden rentgenge túsirýi kerek edi. Qazir Ótegen batyr kentindegi oblystyq aýrýhananyń balalar bóliminde jatyrmyz. Qazir balanyń jaǵdaiy óte aýyr. Ony dáriger bárimizge shyǵyp aitty. Bala qashan oianatyny belgisiz. Tamaq, eshteńe ishpeidi, tek sistemamen jiberip otyramyz. Bizdiń aýyldyń dárigeri birden "bizde ondai qural joq" dep Uzynaǵashqa jiberip tur ǵoi. Hirýrg qaramaǵan bolyp tur ǵoi", - deidi Malika.
Bul derekke qatysty Almaty oblysynyń Densaýlyq saqtaý basqarmasy ókilderi pikir bildirdi.
"2021 jyly týǵan patsient 31 shildeden beri Oblystyq balalar klinikalyq aýrýhanasynda jatyr. "Jambyl aýdandyq ortalyq aýrýhanasynan" shuǵyl túrde tústi. Diagnostikalyq sharalar men operatsiia aldyndaǵy daiyndyqtan keiin operatsiia jasaldy. Operatsiia: ortańǵy laparotomiia, appendektomiia, sanatsiia, ish qýysynyń drenajy, transnazaldy ishek intýbatsiiasy. Operatsiiadan keiingi diagnozy - jedel appenditsit. Qazirgi ýaqytta emdeý sharalary júrgizilip jatyr", - deidi basqarma ókilderi.
